Mbi 50 mijë kosovarë janë infektuar me koronavirus
Javën e fundit është shënuar një rënie e lehtë e rasteve me Covid-19 në Kosovë.
Megjithatë, aktive mbesin mbi 10 mijë raste, ndërsa deri më tani numri total i të infektuarve ka shkuar mbi 50 mijë.
1 mijë e 298 kanë humbur jetën ndërsa kanë shëruar mbi 38 mijë pacientë.
“Numri total i rasteve pozitive është 50.135 raste nga 177.387 persona të dyshimtë në virusin SARS-CoV-2 dhe 1.298 raste të vdekjes. Gjatë 24 orëve të fundit, janë shëruar 538 pacientë derisa numri i përgjithshëm i të shëruarve deri më sot është gjithsej 38.656 raste, kurse numri i rasteve aktive është 10.181”, bëhet e ditur në raportin e fundit të IKSHPK-së.
Në Kosovë vazhdojnë të jenë në fuqi masat kufizuese, ndonëse orari i lëvizjes dhe punës së gastronomisë është zgjatur për një orë.
Në zonën e kuqe vazhdojnë të jenë 8 komuna.
