Matoshi për aktet terroriste të vrasjeve në Francë: Primitivët janë ngritur kundër përparimit
Publicisti i njohur, Halil Matoshi, i cili aktualisht mban postin e zëvendësministrit për Kulturë, Rini dhe Sport ka reaguar edhe ndaj akteve të sotme terroriste në Francë, me ç’rast një fundamentalist islamik vrau tre persona.
Matoshi ka thënë se nga tragjedia e Nicës është i mërzitur populli i Kosovës, i cili para dy dekadash kërkoi shpëtim te Perëndimi.
Postimi i plotë i Matoshit
Viva La France!
1.
Aktet dëshpëruese të terrorit të ndërlidhuna me islamin politik dëshmojnë superioritetin e Perëndimit në të gjitha aspektet e jetës njerëzore!
2.
Nga tragjedia e Nicës nuk është e mërzitun vetëm Franca porse ndihet shpirtërisht i lënduar tërë populli i Kosovës, i cili, më 1999 kërkoi shpëtim nga dhe në Perëndim (dhe Francë) dhe jo në dhe nga Lindja!
3.
Terrorizmi i primë nga islami politik si tendencë kundër qytetërimit Perëndimor, ndonëse i merr në qafë aktualisht qytetarët e rëndomtë, në thelb është rebelim i njerëzve primitivë kundër modernizimit e përparimit të shoqērisë njerëzore, sëkëndejmi, ideologjia që e ushqen terrorizmin është humbëse supreme dhe e padiskutueshme.
4.
Perëndimi do të dalë kurdoherë fitues mbi egërsinë dhe prapambetjën, sepse fitoren ia garanton para së gjithash humanizmi siperan dhe fuqia morale e kulturore!
5.
Kushdo (edhe në truallin e Kosovës) që e përjeton islamin si fe të paqes, duhet të ngritet kundër këtij manifestimi egërshan të fesë për qëllime fashiste.
Zoti nuk është aleat i kriminelëve me thika në duar!
Zoti i jep fuqinë anës së drejtë në histori!
