Malisheva
Malisheva me probleme të furnizimit me energji elektrike, Kastrati: Diskriminim e poshtërim që qytetarët nuk do ta harrojnë
Malisheva por jo vetë, në stinën e dimrit po përballet me reduktime të energjisë elektrike.
Kështu së paku ka thënë kryetari i kësaj komune Ekrem Kastrati.
Ai përmes një shënimi në Facebook ka thënë se për më tepër reduktimet e energjisë po bëhen pa paralajmërim.
“Ky është viti i 3-të radhazi që pikërisht në stinën e dimrit, Malisheva bashkë me qytetarët e saj, mërgimtarët dhe bizneset, po marrin goditjen më të rëndë të mundshme, atë të mungesës së energjisë elektrike, madje me ndërprerje të pakontrolluara dhe pa asnjë njoftim paraprak mbi orarin e reduktimeve”, ka shkruar Kastrati.
Me këtë rast ai ka kërkuar nga KEDS-i dhe qeveria trajtim më të drejt në furnizim me energji elektrike të Malishevës.
“I bëj thirrje kryeministrit, KEDS-it dhe mekanizmave tjerë të nivelit qendror, që shqetësimin e Komunës së Malishevës për këtë trajtim kaq të pa ndershëm që po u bëhet qytetarëve tanë, që edhe në prag të vitit 2024, vetëm komunën tonë po e lenë në terr, të trajtohet urgjentisht, në mënyrë që Malisheva të furnizohet me energji elektrike, ashtu si çdo komunë e Kosovës”.
Ai thotë se ky është një poshtërim për qytetarët e Malishevës.
“Kjo qasje e juaja karshi këtij problemi kaq të madh për qytetarët tanë, është hiç më pak se diskriminim e poshtërim, që Malisheva dhe banorët e saj, historikisht nuk i kanë pranuar, madje as nuk i harrojnë lehtë”, ka përfunduar Kastrati.
VIDEO BONUS: Protestojnë punëtorët e KEK-ut, kërkojnë rritje të pagave
