Maas kërkon që dialogu të rinisë menjëherë, Vuçiq përsërit se Serbia s’e njeh Kosovën

Ministri i Jashtëm gjerman, Heiko Maas, nga Beogradi ka bërë thirrje për vazhdim të dialogut mes Serbisë dhe Kosovës. Pas një takimi me presidentin serb Aleksandar Vuçiq, Maas ka thënë se “tash është momenti i duhur për rinisje të dialogut”, pas bllokimit që nga muaji shtator.

“Të dy shtetet kanë mbajtur zgjedhje të përgjithshme dhe kanë formuar qeveri me shumicë stabile”, ka thënë ai në konferencën për media, një ditë pas vizitës që pati në Kosovë.

Në anën tjetër, Vuçiq ka thënë se Serbia është e gatshme të “sigurojë paqe dhe stabilitet afatgjatë” duke arritur atë që ai e cilësoi si “zgjidhje kompromisi”.

Ai ka thënë se serbët dhe shqiptarët, kanë nevojë për paqe që të arrijnë progres. Megjithatë, ka përsëritur se Serbia s’e njeh Kosovën shtet.

“Ne nuk e njohim pavarësinë e Kosovës, por jemi të gatshëm të diskutojmë për të ardhmen e të gjithë rajonit në një mënyrë serioze dhe të përgjegjshme, duke arritur një kompromis, duke mbrojtur shtetin dhe interesat tonë kombëtare, por në mirëbesim, në mënyrën më të mirë për t’u përpjekur dhe siguruar paqe e stabilitet afatgjatë”, ka thënë ai.

Disa nga propozimet jozyrtare në mediat në Ballkan kohëve të fundit kanë sugjeruar ndryshime kufijsh në Ballkan si pjesë të marrëveshjes, por kjo është refuzuar nga Bashkimi Evropian.