Lista Srpska në Qeverinë e Serbisë -Vuçiq paralajmëron 50 milionë euro investime
Kryetari i Serbisë Aleksandar Vuçiq ka paralajmëruar se në 18 muajt e ardhshëm “do të investohen rreth 50 milionë euro shtesë në hapësira ku jetojnë serbët në Kosovë”.
Pas takimit të qeverisë së Serbisë me përfaqësuesit e Listës Serbe, në të cilin ka marrë pjesë edhe Vuçiq, ai ka thënë se investimet do të përdoren për inicimin e fillimit të punës së “disa fabrikave në veri të Kosovës”, ndërtimin e Qendrës Klinike “shumë të bukur” në Mitrovicë si dhe spitalit në Graçanicë.
Vuçiq ka thënë se do të investohet edhe në frigoriferë dhe si ndihmë për bujqit në jug dhe veri të Ibrit, ndërtimin e qendrave turistike siç është ajo në Banjska, përfundim të investimeve në infrastrukturë dhe rrugë, ujësjellës dhe universitet.