Lista serbe e perkrahe Kurtin per mosshpalljen e gjendjes se jashtezakonshme
Përhapja e koronavirusit në Kosovë, me gjithësej 19 raste të konfirmuara e ka detyruar presidentin Thaçi gjatë ditës së djeshme që të nënshkruajë dekretin ku i propozohet Kuvendit të shpallet gjendje e jashtëzakonshme.
Një propozim i tillë ka hasur në kundërshtimin e fuqishëm të Vetëvendosjes, që bashkë me Listën Serbe janë dy subjektet e vetme që kanë dalë kundër këtij vendimi, shkruan lajmi.net.
Një qëndrim të tillë e konfirmoi edhe zëvendëskryeministri nga radhët e VV-së, Haki Abazi.
Ai mbrëmë me anë të një postimi në Facebook, tha se gjendja e jashtëzakonshme në Kosovë, është një vendim sipas tij qëllimkeq dhe kundër qeverisë së udhëhequr nga Kurti.
“Tentimi për të shpallur gjendjen e jashtëzakonshme përkundër masave dhe veprimeve të shkëlqyeshme të qeverisë, është qëllimkeq dhe në vazhdimësinë e obstruksioneve kundër qeverisë Kurti”, shkroi ndër të tjera Abazi.
Abazi edhe mbrëmë gjatë një konference për media konfirmoi qëndrimin edhe të shefit të tij në qeveri, Albin Kurti se një masë e tillë në këtë periudhë sipas tyre është e panevojshme.
Kundër këtij propozimi, mbrëmë dolën edhe një numër i madh i zyrtarëve të lartë të Vetëvendosjes, sipas të cilëve gjendja është nën kontroll dhe ka mjaftueshëm rezerva ushqimore, ani pse anë e kënd Kosovës qytetarët po presin me orë të tëra për t’u furnizuar me miell, e madje në shumicën e pikave shitëse nuk ka fare sasi të këtij produkti esencial.
Në një vijë me qëndrimin e VV-së është edhe Lista Serbe. Ata sot me anë të një komunikate për media thanë se janë të shqetësuar me planet për shpalljen e gjendjes së jashtëzakonshme.
“I bëjmë thirrje bashkësisë ndërkombëtare që të hedhë poshtë vendosmërisht këto paralajmërime, ndërsa shtetit tonë Serbisë dhe presidentit Aleksandar Vuçiq që në komunikimet me NATO-n dhe partnerët ndërkombëtarë që të reagojë ndaj paralajmërimit të Thaçit, që ka shkaktuar shqetësim të madh ndër qytetarët tanë, të cilët edhe ashtu janë nën tension për shkak të pandemisë së koronavirusit”, thuhet ndër të tjera në komunikatën e Listës Serbe.
Kundërshtimin e VV-së nuk po e përkrah as partneri i saj i koalicionit, Lidhja Demokratike e Kosovës.
Nënkryetari i LDK-së, njëherit edhe ministër i Punëve të Brendshme tha mbrëmë se gjendja në Kosovë është e rëndë, dhe se duhet shpallur gjendje e jashtëzakonshme.
“Nuk është këtu çështja këtu a jemi më kryeministrin a presidentin por duhet të jemi sa më të organizuar, nuk është koha e kapriceve se a duhet të dominojë mendimi i tij apo i këtij, sepse ne jemi në shërbim të Kosovës. Po duhet të shpallet gjendja e jashtëzakonshme”, tha mbrëmë Veliu.
