BE

Liderët e BE-së bien dakord për tre postet kryesore: Presidentin e KE-së, Këshillit Evropian dhe kryediplomatin e Unionit

Liderët e Bashkimit Europian kanë arritur një vendim të përbashkët për tre postet kryesore të bllokut.

Siç raportojnë mediat ndërkombëtare, marrëveshja mbështet treshen e kandidatëve të raportuar më parë : Ursula von der Leyen për presidente të Komisionit Evropian, António Costa për president të Këshillit Evropian dhe Kaja Kallas për Përfaqësuesen e Lartë për Punët e Jashtme dhe Politikën e Sigurisë.

Pavarësisht marrëveshjes së raportuar, vendimi nuk do të bëhet zyrtar derisa 27 liderët të mblidhen në një samit të radhës, më vonë gjatë kësaj jave.

Gjashtë liderët e Bashkimit Evropian që veprojnë si negociatorë të partive kryesore të qendrës kanë nënshkruar marrëveshjen paraprake për të ndarë postet kryesore të bllokut pas zgjedhjeve evropiane të qershorit.

Emrat ishin thuajse të finalizuar në mbledhjen jozyrtare të liderëve gjatë javës së shkuar, por siç raportohet, u finalizuan pas një telefonate midis Donald Tusk të Polonisë, Kyriakos Mitsotakis të Greqisë, Olaf Scholz të Gjermanisë, Pedro Sánchez të Spanjës, Emmanuel Macron të Francës dhe Mark Rutte të Holandës.

Tusk dhe Mitsotakis përfaqësojnë Partinë Popullore Evropiane (EPP) të qendrës së djathtë, Scholz dhe Sánchez Socialistët dhe Demokratët (S&D) dhe Macron dhe Rutte familjen liberale të Renew Europe.

Të tre partitë pritet të punojnë së bashku dhe të ndërtojnë një koalicion të qëndrueshëm që mund të mbështesë mandatin e dytë të Von der Leyen.

Përzgjedhja e posteve kryesore duhet të ratifikohet nga të 27 liderët në një samit vendimtar më vonë gjatë kësaj jave, gjatë të cilit ata do të miratojnë gjithashtu Agjendën Strategjike për pesë vitet e ardhshme.