Lëvizjet në KK të Prishtinës, opozita i quan zhgënjyese nëse bëhen për vota

Që kur është ndarë nga Lëvizja Vetëvendosje, Shpend Ahmeti ka bërë disa ndryshime nëpër drejtori të Komunës së Prishtinës.

Nga to, më së shumti ka përfituar AAK-ja, me të cilën Ahmeti është në koalicion, duke udhëhequr drejtori të rëndësishme, si ajo e pronës, raporton emisioni 038 i KTV-së.

Përveç tyre, kohëve të fundit janë bërë ndryshime edhe në përfaqësimin e këshilltarëve komunalë.

Fiknete Bejta, nga LDK-ja, iu bashkua Grupit të asamblistëve të AAK-së. Derisa edhe Bukrie Canolli la Lëvizjen për Bashkim, për t’u bërë pjesë e AAK-së.

Këto lëvizje po shihen si synime të kryetarit Ahmeti për forcimin e pozicionit të tij brenda Kuvendit.

PDK-ja thotë se është zhgënjyese nëse këto ndryshime bëhen për vota, e jo për të mirën e qytetarëve.

Përfaqësuesi i vetëm që ka mbetur nga Lëvizja për Bashkim, Agim Kuleta, thotë se nuk i rrezikohet pozita që mban si kryesues i Kuvendit Komunal.

Pas largimit të Vetëvendosjes nga qeverisja në Prishtinë, partnerë të PSD-së në kryeqytet mbeten AAK-ja, AKR-ja, LB-ja, Nisma dhe Alternativa.

Një nga ndryshimet në kabinetin e Ahmetit që bëri më së shumti bujë së fundmi, është shkarkimi i drejtorit të Arsimit, Jonuz Salihaj.

Salihaj tha se partia e tij e largoi për shkak se nuk pranoi të regjistrojë pa merita nxënës nëpër shkollat e kryeqytetit.

Duke folur për rastin e paraardhësit të saj, drejtoresha e re e Arsimit, Shpresa Shala, thotë se ajo nuk do të merret me regjistrimet e nxënësve nëpër shkolla.

Shala thotë se kjo është kompetencë e drejtorëve të shkollave, jo e dikasterit që drejton.

Ajo thotë se do të fokusohet në ngritjen e cilësisë së arsimit në shkollat e kryeqytetit.