LDK pas vendimit të Kushtetueses: Më e pakta që duhet të ndodh është shkarkimi i menjëhershëm i Albulena Haxhiut
Vendimin e sotshëm të Gjykatës Kushtetuese për rrëzimin e Ligjit për Këshillin Prokurorial, Lidhja Demokratike e Kosovës (LDK) e ka vlerësuar dështim të radhës për kapje të shtetit.
Në reagim e LDK-së thuhet se Gjykata Kushtetuese i ka vlerësuar si të pranuara të gjitha pretendimet e ngritura se ligji në fjalë në pjesën materiale të tij është kundër kushtetues dhe se rrjedhimisht ai duhet të shpallet i pavlefshëm në tërësinë e tij.
“Rrëzimi i këtij ligji është rrëzim i tendencës së pushtetit për të kapur sistemin e drejtësisë. Lidhja Demokratike e Kosovës, vlerëson se më e pakta që duhet të ndodh tani është shkarkimi i menjëhershëm i Ministres së Drejtësisë Albulena Haxhiu si shkelëse e Kushtetutës së Republikës së Kosovës”, thuhet në reagimin e LDK-së.
Tutje, LDK thotë se shkelësit e kushtetutës nuk duhet të kenë vend në institucionet publike, aq më pak në krye të institucionit kryesor të drejtësisë.
Komunikata e plotë:
Dështimi i radhës për kapje të shtetit.
Sot Gjykata Kushtetuese e shpalli Aktgjykimin lidhur me vlerësimin e kushtetutshmërisë së Ligjit nr. 08/L-136 për Ndryshimin dhe Plotësimin e Ligjit nr. 06/L-056 për Këshillin Prokurorial të Kosovës.
Gjykata Kushtetuese i ka vlerësuar si të pranuara të gjitha pretendimet e ngritura nga Lidhja Demokratike e Kosovës (LDK), se ligji në fjalë në pjesën materiale të saj është kundër kushtetues, rrjedhimisht ai duhet të shpallet i pavlefshëm në tërësinë e tij.
Rrëzimi i këtij ligji është rrëzim i tendencës së pushtetit për të kapur sistemin e drejtësisë.
Lidhja Demokratike e Kosovës, vlerëson se më e pakta që duhet të ndodh tani është shkarkimi i menjëhershëm i Ministres së Drejtësisë Albulena Haxhiu si shkelëse e Kushtetutës së Republikës së Kosovës.
Shkelësit e kushtetutës nuk duhet të kenë vend në institucionet publike, aq më pak në krye të institucionit kryesor të drejtësisë.
Lidhja Demokratike e Kosovës ndërsa, gjithmonë do jetë në mbrojtje të Republikës sonë dhe rendit tonë kushtetues; një fushë që ky pushtet duket se nuk e kupton.
LDK – Zyra për Informim