Pas mbledhjes së kryesisë së LDK-së, Besian Mustafa, nga kjo parti ka thënë se më 31 janar është ftuar mbledhja e Kuvendit të LDK-së. Në atë mbledhje siç deklaroi Mustafa, kryetari i LDK-së, Lumir Abdixhiku do të ofrojë dorëheqjen dhe do të lihet i lirë ky organ i partisë që të vendosë.
“Pati një diskutim gati 4 orësh të hapur e demokratik duke shtjerrë debatin në secilën pikë të mundshme. Duke analizuar edhe rezultatin e zgjedhjeve të 28 dhjetorit. Më 31 janar është ftuar mbledhja e Kuvendit të LDK-së. Në këtë Kuvend siç është deklaruar vetë kryetari Lumir Abdixhiku, ai do të ofrojë dorëheqjen për të lënë lirë Kuvendin të vendosë edhe për këtë çështje edhe për çështjet e tjera e diskutimet e tjera që mund të ngriten në atë Kuvend”, ka thënë Mustafa pas mbledhje së kryesisë së LDK-së.
Tutje zëdhënësi i LDK-së, ka thënë se në mbledhjen e Kuvendit të LDK-së, kryetari Lumir Abdixhiku do të kërkojë votëbesimin e delegatëve për të vazhduar edhe më tutje ose jo me udhëheqjen e kësaj partie.
“Kjo është formë që e kërkon vetë kryetari i partisë Lumir Abdixhiku. Në këtë Kuvend do të kërkojë votë të votëbesimit. Pra Kuvendi i cili ka 355 delegatë do të vendosë për këtë kërkesë nëse do të kenë akoma besim në kryetarin Lumir Abdixhiku. Pra është kërkesë për votëbesim”, ka thënë Mustafa.







