Prokuroria Speciale e Kosovës ka njoftuar të mërkurën për ngritjen e aktakuzës ndaj 45 personave për sulmin terrorist në Banjskë të Zveçanit më 24 shtator 2023.

Kryeprokurori i Prokurorisë Speciale, Blerim Isufaj, ka thënë se Prokuroria pas grumbullimit të provave sot ka ngrit aktakuze, kundër 45 pandehur për këtë rast, pranë Gjykatës Themelore, raporton Ballkani.info.

45 të pandehur akuzohen për terrorizëm, shpërlaje parash etj.

Për vonim të aktakuzës, Isufaj ka thënë se shkaku kryesor ishte pranimi i rezultateve të ekzaminimeve të kryera jashtë vendi.

“Në baza të ndryshme hetimore kemi qenë të kufizuar në dhënien e informacioneve, na është dashur të presim gjatë ndoshta edhe një vit. Pranimi i raporteve të ekzaminimeve është një nga shkaqet kryesore për vonim të ngritjes së aktakuzës” – tha Isufaj.

Më 24 shtator të vitit të kaluar, një grup i armatosur serb e pati sulmuar Policinë e Kosovës në Banjskë, duke lënë të vrarë rreshterin Afrim Bunjaku. Nga shkëmbimi i zjarrit janë vrarë edhe tre sulmues serbë, ndërkaq pjesa tjetër e grupit kishte ikur në drejtim të Serbisë.

Përgjegjësinë për sulmin e pati marrë ish-nënkryetari i Listës Serbe, Milan Radoiçiq, i cili tani ndodhet në Serbi. /Ballkani.info/