Lajm i trishtë! Ndërron jetë dirigjenti i njohur shqiptar, Kristë Lekaj
U bë i njohur lajmi se Kristë Lekaj u largua nga jeta.
Përmes një shkrimi të bërë në rrjete sociale Filharmonia e Kosovës, kanë ngushëlluar familjen e dirigjentit, Kristë Lekaj.
Në postimin e bërë u tha se anëtarët e Filharmonisë së Kosovës do ta kujtojnë atë me shumë respekt angazhimin e tij në fushën e muzikës.“Jemi të prekur nga lajmi për ndarjen nga jeta të kompozitorit dhe dirigjentit, Kristë Lekaj.Përveç punës shumëvjeçare në produksionin e Radiotelevizionit të Prishtinës, Lekaj ka punuar, pas luftës, për disa vjet, edhe me Korin e Filharmonisë së Kosovës si dirigjent dhe korepetitor.Kristë Lekaj (1935-2021) u nda nga kjo jetë për të lënë pas vetes vepra me vlerë. Me punën dhe kontributin e tij, ai ka fituar respektin e të gjithëve që e kanë njohur. Anëtarët e Filharmonisë së Kosovës do ta kujtojnë me respekt angazhimin e tij të çmuar në fushën e muzikës.Ngushëllime familjes, miqve dhe dashamirëve të Krist Lekajt. Pastë dritë shpirti i tij!*Fotografi nga koncerti i Filharmonisë së Kosovës me dirigjent Fernando Briones i datës 10.03.2019 ku u interpretua premierë vepra “Rekuiem” për kor dhe orkestër, e kompozitorit Kristë Lekaj.Biografi e shkurtër:Kristë Lekaj u lind në Shkup më 1935. Kreu Shkollën e Mesme të Muzikës në Prizren, diplomoi në seksionin e teorisë së muzikës në Akademinë e Muzikës në Beograd. Për një kohë, disa vjet kishte qëndruar në Tiranë për të marrë mësime nga Çesk Zadeja, në fushën e kompozimit. Pas studimeve u kthye në Prizren, ku punoi si pedagog në Shkollën e Muzikës. Pas Prizrenit erdhi në Prishtinë, ku krahas punës pedagogjike në Shkollën e Lartë Pedagogjike – Dega e Muzikës, deri në pensionim, punoi në seksionin e muzikës në Radiotelevizionin e Prishtinës. Ka qenë aranzhues i shumë këngëve të muzikës argëtuese si dhe dirigjent. Opusi krijues i tij përbëhet nga një numër jo shumë i madh i veprave të muzikës serioze, ndër të cilat, poema simfonike “Trualli betohet”, “Impresione simfonike” për orkestër, “Suitë korale” për kor miks, muzika e filmit, “Proka”, “Requiem” për kor dhe orkestër e të tjera.”, ishte postimi i plotë nga faqja zyrtare.
