21 janari sipas njoftimit zyrtar të Kuvendit të Kosovës është dita kur fillon sesioni pranveror për punimet e këtij institucioni.
Gjatë kësaj javë janë paraparë që të mbahen disa mbledhje të komisioneve. Sot është paralajmëruar mbajtja komisioni për Arsim, Shkencë dhe Teknologji. Por, mbledhja e këtij komisioni kishte dështuar shkaku i mungesës së kuorumit.
Këtë e ka bërë të ditur kryetari i Komisionit Ismajl Kurteshi i cili edhe kishte shprehur pakënaqësitë që deputetët nuk po marrin pjesë në komision.
Nesër më 22 janar pritet të mbahet mbledhja e Komisionit për të Drejtat e njeriut, Barazi Gjinore, për Persona të Pagjetur dhe Peticione, komisioni për Zhvillim Ekonomik, Infrastrukturë, Tregti, Industri dhe Zhvillim Rural.
Ndërsa të mërkurën me 23 janar pritet të mbahen komisioni për Mbikëqyrjen e Financave Publike si dhe komisioni për Shëndetësi, Punë dhe Mirëqenie Sociale.
Gjithashtu, kryesia e Kuvendit të Kosovës kishte mbajtur mbledhje javën e kaluar.
Kryetari i Kuvendit të Kosovës Kadri Veseli, kishte paralajmëruar se në janar do të mbahen dy seanca me datën 30 dhe 31.
“Kena fillu mirë, shumë pozitive në mbledhjen e kryesisë, do të kemi seanca me datën 30 dhe 31 e cila do të jetë me disa pika rendit të ditës. Është Ligji i Buxhetit dhe statusi i Trepçës, Ligji për Paga dhe një mori ligjesh të tjera që janë në interes të qytetarëve. Por viti 2019 do te jetë viti i suksesit të Kosovës”, tha Veseli.







