Kurti takohet me Ministrin e Jashtëm të Malit të Zi, ja çfarë u bisedua
Kryeministri i Kosovës, Albin Kurti, është takuar me ministrin e punëve të jashtme të Malit të Zi, Ranko Krivokapiq, në margjinat e “Symi Symposium” që po mbahet në Athinë.
Në këtë takim, sipas një komunikate të lëshuar në Zyra e Kryeministrit, është folur për marrëdhëniet mes dy vende si dhe është vlerësuar bashkëpunimi i ngushtë që kanë dy shtetet.
Kjo është komunikata e plotë:
Kryeministri Kurti takoi Ministrin e Jashtëm të Malit të Zi, Ranko Krivokapiq
Athinë, 11 korrik 2022
Pas diskutimit në panel në “Symi Symposium” me temën “Implikimet e luftës në Ukrainë: Momentum i ri për zgjerimin e BE-së dhe anëtarësimin e Ballkanit Perëndimor? Mundësitë dhe skenarët” që u mbajt sot në Athinë të Greqisë, Kryeministri i Republikës së Kosovës, Albin Kurti takoi Ministrin e Punëve të jashtme të Malit të Zi, Ranko Krivokapiq.
U bisedua për zhvillimet e fundit në Republikën e Malit të Zi, si dhe marrëdhëniet bilaterale mes dy vendeve, të bazuara në fqinjësi të mirë dhe vlerësim të ndërsjellë. Në takim u vlerësua bashkëpunimi i ngushtë mes Republikës së Kosovës dhe Republikës së Malit të Zi në shumë fusha.
Po ashtu, u diskutua për ndikimin e Federatës Ruse në rajonin e Ballkanit Perëndimor dhe rrezikun që ky ndikim paraqet për paqen dhe stabilitetin në rajon.