Albin Kurti

Kurti lavdëron DokuFestin, asnjë fjalë për Sunny Hill-in

Kryeministri Albin Kurti ka thënë se DokuFest, që ka nisur mbrëmë, është ngjarja më e madhe kulturore ndërkombëtare në Kosovë.

Ai ka thënë se DokuFest edhepse ka tri dekada që ekziston nuk e ka humbur asnjëherë magjinë e vet, por gjatë këtyre ditëve ai nuk e ka përmendur Festivalin Sunny Hill që mbahet në Kosovë dhe rreth vetes ka mbledhur mijëra njerëz nga gjithë bota.

Madje, për dallim nga presidentja Vjosa Osmani, kryeministri Kurti nuk e ka takuar yllin kosovar me famë botërore Dua Lipën dhe nuk është parë në asnjërën nga mbrëmjet e këtij festivali, shkruan Demokracia.com.

“DokuMagjia! DokuFest është ngjarja më e madhe kulturore ndërkombëtare në Kosovë. Më shumë se vetëm ngjarje, DokuFest është institucion i rëndësishëm i krijimtarisë dhe edukimit artistik. Ndonëse ka hyrë në dekadën e tretë të ekzistencës, festivali asnjëherë nuk e humbi magjinë e vet. Përkundrazi, edhe ky edicion që nisi mbrëmë, premton një javë plot shkëlqim mbi gurët e monumenteve të Prizrenit”.

“DokuFest është mënyra më efektive për t’ia rrëfyer botës krijimtarinë dhe potencialin tonë artistik, zellin e talentin rinor. Ai është edhe ekonomi për qytetin, edhe vullnetarizëm për rininë, edhe rrjetëzim për artistin, edhe kulturë për turistin”.

Kurti, përmes një postimi në Facebook, thotë se ka qenë pjesëmarrës i vazhdueshëm në DokuFest, derisa thotë se tash si kryeministër e ka përgjegjësinë që festivalet e tilla të kenë mbështetje më të madhe.

Ai ka falënderuar të gjithë ata që e kanë nisur këtë festival, derisa ka thënë se gjatë kohës sa zgjat festivali do të shkoj sërish në Prizren.

“Si adhurues i kinemasë dhe i qytetit të Prizrenit, natyrshëm kam qenë pjesëmarrës i rregullt i edicioneve të festivalit. Tash me përgjegjësi shtesë, në krye të Qeverisë që po e realizon reformën më të madhe kulturore ndonjëherë në vend, që DokuFest dhe pjesa tjetër e skenës së pavarur kulturore të gëzojnë mbështetje të rritur dhe partneritet strategjik për nevojat zhvillimore dhe diplomatike të shtetit tonë”.

“Edicioni XXI është mundësi e mirë dhe arsye e fuqishme për të shprehur mirënjohjen tonë të thellë për ata që patën guxim në fillim. Dhe pastaj edhe vizion, durim e përkushtim. Faleminderit Veton, Aliriza, Samir, Eroll B, Linda, Nita, Eroll Sh, Alba, Jeton, Orhan, Burim, Dafina, Ares dhe plot të tjerë deri te mijëra vullnetarë përgjatë viteve e dekadave. Filmat, mbrëmjet e muzikës, punëtoritë, ngjarjet e tjera, një program fantastik sivjet. Gjatë këtyre tetë ditëve, do të më shihni sërish në Prizren. Magjia rifilloi”.

Në qershor të këtij viti mbajtja e këtij festivali në Prishtinë u anulua për shkak të mosmarrëveshjeve rreth një prone që i ishte ndarë Sunny Hill-it nga komuna e Prishtinës. Organizatorët thanë se do ta zhvendosin festivalin në Tiranë, meqë mosmarrëveshjet politike pamundësuan mbajtjen e tij në Prishtinë.

Një marrëveshje ndërmjet qeverisë së Kosovës dhe komunës së Prishtinë mundësoi rikthimin e festivalit në Prishtinë, pas reagimeve të shumta që kishte nxitur vendimi për mos mbajtjen e tij në kryeqytet.

Pas Prishtinës ku festivali  do të mbahet edhe në Tiranë nga 26 deri më 28 gusht.

Festivali Sunny Hill filloi në vitin 2018 në Prishtinë dhe u mbajt sërish në vitin 2019. Ndërsa pandemia e COVID-19 pamundësoi mbajtjen e tij më 2020 dhe 2021.