Kurteshi: Ndërhyrjet politike po e dëmtojnë arsimin
Teksa ka komentuar të gjeturat e Raportit të Vendit për vitin 2019, deputeti i Lëvizjes Vetëvendosje, Ismajl Kurteshi, ka ngritur shqetësimin e tij sa iu përket të gjeturave në sistemin e arsimit, me ç’rast ka thënë se do të duhej të kishte investime shumë më të mëdha në këtë fushë.
“Do të duhej te investohej në bazë, në shkolla, aty ku janë nxënësit, mësuesit. Në shkollat tona gjendja ka mbetur ajo që ka qenë”, ka deklaruar ai.
Në mbledhjen e Komisionit për Integrime Evropiane, ku po bëhet prezantimi i këtij raporti, Kurteshi tha se arsimit po i bëjnë dëm ndërhyrjet direkte të politikës.
“Ndërhyrjet politike po e dëmtojnë arsimin, ato po vazhdojnë edhe sot të jenë prezente në çështjen e arsimit”, u shpreh deputeti i LVV-së.
Gjatë ditës së sotme, në mbledhjen e komisionit për Integrime Zëvendësshefi i Zyrës së BE-së në Kosovë, Riccardo Serri, ka bërë prezantimin e Raportit për Vendin, me ç’rast ka thënë se nuk është punuar sa duhet as në fushën e arsimit dhe të mjedisit.
