Kadri Kryeziu
Kryeziu: Drafti i Asociacionit është më shumë politik sesa juridik
Ish-gjyqtari i Kushtetueses, Kadri Kryeziu, në emisionin “FIVE” në RTV Dukagjini, ka thënë se çështja e Asociacionit është e ndërlikuar.
“Gjithmonë jam përmendur disa kompromise të dhimbshme, ndoshta një e keqe e domosdoshme në të cilën ne si Kosovë, si shtet, e kemi për obligim integrimin e minoritetit serb në Kosovë, përmes kërij entiteti, I cili është ekskluziv, i veçantë, specifik”, ka thënë Kryeziu.
“Detyra kryesore është e jona, e Kosovës. Qeveria e Kosovës ka për detyrë të implementojë ligjin që ka kaluar në Parlamentin e Kosovës, dhe Qeveria e Kosovës ka për detyrë implementimin e draft-statutit, të cilin nuk e ka bërë vet por superfuqitë, shtetet”, ka thënë ai.
Kryeziu ka thënë se draft-statuti i Asociacionit është më shumë politik se sa juridik.
“Në bazë të preambulës ose hyrjes, e ka krejt në rregull sepse bazohet në ligjet pozitive të Kosovës, në Kushtetutën e Kosovës dhe në konventa ndërkombëtare për minoritete. Pushteti është ekzekutiv por është lokal, nuk është qëndror, ashtu është mendimi im”, ka shtuar ish-gjyqtari i Kushtetueses.
AI ka shtuar se ky draft duhet të kontrollohet. “Kontrolli ka me qenë politik, administrativ, i sigurisë dhe ndërkombëtar. Me sa e vërejta unë ka me qenë një pilot-projekt, dy plus tri”.
