Kandidati për kryetar të Partisë Demokratike të Kosovës, Memli Krasniqi ka thënë që PDK-ja është partia që ka bërë më së shumti transformimi në histori të Kosovës. Ai gjatë fjalimit në Konventën e PDK-së, tha se asgjë e madhe dhe e rëndësishme nuk ka ndodhur pa PDK-në.
Krasniqi deklaroi se nuk do të lejojnë që ky rrëfim i PDK-së të shtrembërohet nga të tjerët.
“Partia Demokratike e Kosovës është partia që ka bërë transformimin më të madh në historinë e Kosovës. Bash asgjë e qëndrueshme, e madhe dhe e rëndësishme nuk ka ndodhur pa PDK-në. Nëse ka pasur zhvillim, investim, arsim, e rritje të mirëqenies, kjo ka qenë periudha jonë në qeverisje nga 2008 deri në 2017. Ky është rrëfimi ynë i vërtetë, dhe këtë e dinë qytetarët. Nuk do të lejojmë që këtë rrëfim ta shtrembërojnë dhe ta errësojnë të tjerët, sepse është i qartë si drita. I matshëm, i prekshëm, real dhe diçka që e ka përjetuar dhe prekur secili”, ka thënë ai.
Ai përmendi dhe qeverinë “Kurti”, për të cilën tha se po e rrezikon perspektivën e qytetarit dhe të shtetit të Kosovës.
`“Sot, për fat të keq, të gjitha këto arritje po rrezikohen me qëllim të keq, nga mentaliteti mohues dhe mosmirënjohjes i qeverisjes aktuale, duke e rrezikuar edhe vetë perspektivën e qytetarit dhe shtetit të Kosovës”, ka thënë Krasniqi.
Sipas tij, madje të paktën as 100 ditët e qeverisjes së Albin Kurtit, s’mund të krahasohen me qeverisjet që ka bërë PDK-ja më parë.
”Do ta kemi në funksion të korrektimit të kësaj qeverie krejtësisht apatike, e cila e ka treguar saktë se çfarë qeverie është në këto 100 ditë, e të cilat cilido prej jush mund t’i krahasoni me secilën prej qeverisjeve të kaluara, të pasluftës sepse me qeverisjen e PDK-së s’mund të krahasohen – [Qeveria Kurti] është më e zbehtë dhe më pa rezultate se cilado qeverisje në të kaluarën”.
”Kështu ne do ta luajmë rolin tonë opozitar, në një mënyrë që do të jetë edhe në përputhje me pritjet dhe kërkesat e qytetarëve të Kosovës, jo vetëm të votuesve të PDK-së”







