Reagimr
“Kosova shtet i pavarur është projekt i përkohshëm”, deklarata e Aliut nxit reagime të shumta
Deklarata e Ministrit të Mjedisit, Planifikimit Hapësinor dhe Infrastrukturës, Liburn Aliu, se “Kosova është projekt i përkohshëm”, ka nxitur reagime të shumta nëpër rrjete sociale. Ndaj tij janë drejtuar kritika, derisa është quajtur “politikan sharlatan”.
Ministri i Infrastrukturës, Liburn Aliu, ka bërë mbrëmë një deklaratë në emisionin “ZANAT” në T7, e cila ka ngjallur reagime të shumta.
Aliu tha se Kosova është një projekt i përkohshëm, duke iu referuar aspiratës për bashkim me Shqipërinë.
”Unë e shoh sot Kosovën më shumë se një projekt të përkohshëm. Cilat janë elementet që sot përpiqen me kriju kombin kosovar? Kushtetuta e Republikës së Kosovës është e një vendi multi-etnik, çfarë është kosovari, a është kosovari shqiptar apo diçka tjetër, nëse do të krijonim një komb që do të synonte një përzierje të etnive nuk e di sa do të ketë sukses, dhe nuk është duke pasur sukses”.
“Unë mendoj që projekti Kosova shtet i pavarur është një projekt i përkohshëm që ka me marrë një rrugë. Rruga është normale, zhvillimi ekonomik, qarkullimi i vazhdueshëm brenda gjithë ballkanit, do ta kthejë në vendin e vet ku do të shuhen të gjitha ato shovinzimat e të gjithë do të ktheheshin në vendin e vet”, ka thënë Aliu
Deklarata e tij ka nxitur reagime nëpër rrjete sociale. Deputetja nga radhët e PDK’së, Eliza Hoxha, i është referuar deklaratës së Aliut, duke thënë se “Kështu e shohin Kosovën, njerëzit që i keni votuar 51%”.
Analisti Imer Mushkolaj e ka quajtur Aliun “politikan sharlatan” si dhe “dështak e demagog të gërditshëm”, pas kësaj deklarate.
“Qe një politikan sharlatan, i cili nuk i beson shtetit të cilit do të duhej t’i shërbente. Nëse ky nuk i beson shtetit të vet, qysh me i besu qytetarët këtij dhe të tjerëve si ky, që kanë me e kry ndonjë punë t’hajrit, që e çojnë këtë vend përpara. Një dështak e demagog i gërditshëm”, ka shkruar Mushkolaj.
Ndërkohë, zyrtarja e LDK’së, Jehona Lushaku Sadriu, ka reaguar duke thënë se Kosova është e përjetshme e “Qeveria e VV-së e përkohshme!”.
“Kosova shtet i përkohshëm?! Kështu po thotë sonte MINistri Liburn Aliu, nga partia që se njeh Kosovën shtet! Nga PARTIA (VV), që nuk ka guxim të intonojë himnin e Kosovës në mbledhjen e Këshillit të përgjithshëm të partisë! Këta janë ministrat dhe partia që guxojnë veq paratë edhe privilegjet me ia marr këtij ‘shtetit të përkohshëm’. Kosova është e përjetshme! Qeveria e VV-së e përkohshme!”, ka shkruar zyrtarja e LDK’së.
Ndërsa, gazetari Ilir Mirena duke iu referuar Aliut, ka thënë se “Ju jeni t’perkohshem, Kosova eshte e perjetshme…”.
