Kjo është gjendja shëndetësore e 32-vjeçarit që mbeti i plagosur dje në Kaçanik
Hasan Berisha ka mbetur i vrarë dje në Kaçanik ndërsa vëllai i tij Kastriot Berisha i plagosur.
Kastriot Berisha është dërguar në Qendrën Klinike Universitare për trajtim.
Për gjendjen e tij shëndetësore për Insajderin ka folur drejtori i Klinikës Emergjente, Naser Syla.
“Ne e kemi kryer operacionin mbrëmë. I njëjti ndodhet në mjekim intensiv”, ka thënë shkurt Syla.
Por si ndodhi i gjithë rasti?
Gjatë ditës së djeshme Hasan e Kastriot Berisha u sulumuan me armë zjarri.
Hasan Berisha mbeti i vrarë në vendin e ngjarjes teksa Kastriot Berisha u plagos, në qafë.
Krimi ka ndodhur në lokacionin e njohur si “Fusha e Pajtimit” ”, përballë Varrezave të Dëshmorëve, në magjistralen Ferizaj-Kaçanik.
Detaje për rastin kanë dhënë edhe nga Policia përmes raportit 24 orësh.
“Është raportuar se një i dyshuar mashkull kosovar dyshohet se ka shtënë me armë zjarri ndaj dy viktimave meshkuj kosovarë. Si pasojë e të shtënave njëri nga viktimat ka ndërruar jetë ndërsa tjetri është dërguar në spital në gjendje të rëndë pa vetëdije. Të gjitha njësitë përkatëse kanë dalë në vendin e ngjarjes. Trupi i pajetë është dërguar në IML për obduksion. Në lidhje me rastin dy të dyshuar gjenden në arrati”, thuhet në njoftim.
Sipas raportimeve në media, shkak i kësaj tragjedia po del të jetë një borxh që personi I dyshuar për vrasje ua kishte viktimave.
