Kërkohet intervistimi i Sami Lushtakut pas përleshjes së djeshme në Skenderaj

Në incidentin e Kuvendit të PDK-së, në Klinë të Epërme, ish-kryetari i Skënderajt, Sami Lushtaku ka qenë protagonist kryesor.

KTV-ja ka mësuar nga burimet e afërta me ngjarjen se Lushtaku, që udhëheq me degën e PDK-së në këtë qytet, e ka kërcënuar delegatin Murat Mecini për prishjen e Kuvendit.

Ai i ka thënë Mecinit se do ta “tërhiqte zvarrë”, sipas vetë denoncimit që ky i fundit e ka bërë në Stacionin Policor të Skënderajt.

Mecini është pjesë e krahut të Bekim Jasharit e Bekim Haxhiut, që është në konflikt të vazhdueshëm me krahun e Sami Lushtakut.

Ballkani.info ka provuar të kontaktojë me Lushtakun për të konfirmuar ngjarjen, por telefoni i tij ka qenë i pa çasshëm.

Për shkak të incidentit, Policia e Kosovës është e interesuar që ta intervistojë Lushtakun, dhe ia ka lënë ftesën në shtëpi, sepse nuk e ka gjetur aty.

Prokurorja kujdestare, Slavica Mavriq ka konfirmuar për KTV-në se ajo është informuar për rastin, dhe e ka marrë përsipër që të zhvillojë hetimet duke dëgjuar në ditët në vazhdim palët e përfshira.

Incidenti është paraqitur në raportin 24 orësh të Policisë, por aty nuk janë përmendur emra.

Tensione në degën e PDK-së në Skenderaj ka pasur që prej kohës kur kjo parti vendosi të mos dalë me kandidat për kryetar komune, por e përkrahu kandidaturën e Bekim Jasharit.