Kërcënon Serbia: Nëse Kosova i shkel detyrimet e saj, ne e dimë se çfarë të bëjmë

Ministri i Punëve të Jashtme në Serbi, Nikolla Selakoviq ka thënë se Beogradi po e mban detyrimin që të përmbahet nga fushata për çnjohjet e pavarësisë së Kosovës.

Kryediplomati serb kërcënoi se nëse Kosova do ta nisë fushatën e mbërritjes së njohjeve të reja, “ne e dimë se çfarë të bëjmë”.

“Marrëveshja e Washingtonit krijoi një zotim që Beogradi nuk duhet ta drejtojë ndonjë fushatë “çnjohjeje” dhe që Prishtina të mos aplikojë për anëtarësim në organizata ndërkombëtare ose të drejtojë ndonjë fushatë të re për njohje. Ne po i përmbahemi detyrimeve tona dhe do t’i mbajmë ato, dhe nëse ato shkelen nga ana tjetër ne e dimë se çfarë të bëjmë”, tha Selakoviq.

Ai tutje i thuri lavde shefit të tij, ndërsa kujtoi se presidenti serb, Aleksandar Vuçiq tha se askush nuk duhet ta nënvlerësojë fuqinë e Serbisë.

“Ajo që është e qartë për të gjithë është se kur të bini dakord për diçka me Beogradin, ajo përmbushet dhe do të jetë kështu edhe në të ardhmen”, theksoi Selakoviq.