Kërcënohet me jetë kryetari i komunës së Pejës dhe familja e tij
Kreu i Komunës së Pejës, Gazmend Muhaxheri, është kërcënuar, përmes Facebook-ut, nga dy persona, dy ditë më parë.
Nga dy profile të ndryshme, përmes mesazheve në Facebook dy persona kanë kërcënuar Muhaxherin dhe familjen e tij.
Rastin e ka konfirmuar zëdhënësi i Policisë së Pejës, Fadil Gashi.
Ai ka thënë se kreu i Pejës është kërcënuar me datë 14 nëntor.
“Po, është kërcënuar me datë 14 nëntor përmes rrjeteve sociale. Me rastin janë duke u marrë hetuesit rajonalë”, ka thënë Gashi.
Ai shton se tashmë janë verifikuar dy profile nga ku janë dërguar mesazhet kërcënuese. Deri më tani policia nuk e ka ndaluar asnjë person të dyshuar.
“Dy profile janë duke i verifikuar pasi kanë dërguar dy mesazhe, rastin e ka raportuar dje. Nuk është ndalur ende asnjë person”, tha ai.
Gazeta Express ka provuar të kontaktojë edhe Muhaxherin por ai nuk ka qenë i qasshëm përmes telefonit.
