Gjatë ditëve të kaluara, është folur rreth çmimit të naftës në Kosovë dhe arsyet pse ky çmim është ende në ngritje, përderisa çmimi i naftës ka rënë edhe në vendet e rajonit.
Pas kësaj, kishte reaguar edhe kryeministri i Kosovës, Ramush Haradinaj i cili kishte thënë se naftëtarët duhet të ulin çmimin e naftës ose t’a arsyetojnë atë, transmeton Ballkani.info.
Gjatë ditës së sotme, Haradinaj ka mbajtur edhe një takim me përfaqësuesit e Shoqatës se Naftëtarëve.
Në anën tjetër gazetari i njohur, Adriatik Kelmendi përmes një statusi në Facebook ka thënë se është krijuar monopol i shëmtuar.
Postimi i plotë i Kelmendit:
Vlerësohet se naftëtarët po fitojnë nga 12-14 cent për litër. Duke bërë marrëveshje mes vete ata kanë krijuar monopol të shëmtuar. Çdo fitim më i madh se 5-6 centë në litër është haraç që naftëtarët po ia vëjnë qytetarit.
Pa asnjë dyshim duhet të ketë një dakordim të fshehur të shitësve të derivateve të naftës për të mos e ulur çmimin, edhe pse çmimi i naftës ka rënë në tregun botëror. Në vendet e rajonit ka ndodhur kjo ulje, në Kosovë jo. E Kosova është shteti më i varfër i rajonit!







