KDI-ja kërkon nga LVV-ja urgjentisht formimin e qeverisë së re

Instituti Demokratik i Kosovës (KDI), vlerëson qasjen konstruktive të subjekteve politike për konstituim pa vonesë të Kuvendit, më 26 dhjetor të vitit që lamë, megjithatë korniza institucionale në bazë të rezultateve të zgjedhjeve të 6 tetorit 2019 mbetet ende pa u kompletuar tërësisht.

Duke pasur parasysh që vendi është duke u udhëhequr nga një qeveri në dorëheqje prej më shumë se gjashtë muajsh, KDI vlerëson se krijimi i qeverisë së re është urgjent.

“Duke qenë se kanë kaluar 100 ditë që nga mbajtja e zgjedhjeve, proces ky i zhvilluar në përputhje me standardet demokratike dhe me rezultate të pranuara dhe legjitime, KDI-ja kërkon nga Lëvizja Vetëvendosje, si subjekti politik fitues i zgjedhjeve, të gjejë një zgjidhje sa më të shpejtë për formimin e Qeverisë së Republikës së Kosovës në marrjen e detyrave dhe përgjegjësive kushtetuese e ligjore”, thotë KDI-ja në një komunikatë dërguar mediave.

Secila vonesë në materializimin e vullnetit politik dhe besimit të qytetarëve, sipas KDI-së, do të ndikojë negativisht në adresimin e çështjeve që kërkojnë trajtim të menjëhershëm, siç janë miratimi i buxhetit, sundimi i ligjit dhe zhvillimi ekonomik.