Kryetari i Junikut, Ruzhdi Shehu, ka njoftuar për një zhvillim të rëndësishëm për komunën, duke bërë të ditur nënshkrimin zyrtar të një marrëveshjeje bashkëpunimi me European Association of Regional & Local Authorities for Lifelong Learning, një rrjet me seli në Bruksel dhe i mbështetur nga Komisioni Evropian.

Sipas njoftimit, kjo marrëveshje e bën Junikun komunën e parë në Ballkan që vendos një bashkëpunim zyrtar me EARLALL, duke shënuar një hap të rëndësishëm drejt forcimit të lidhjeve ndërkombëtare dhe integrimit në rrjetet evropiane të arsimit dhe zhvillimit.

Ky partneritet pritet të krijojë mundësi të reja për të rinjtë, edukatorët dhe institucionet lokale, përmes përfshirjes në projekte evropiane, shkëmbimit të përvojave dhe politikave, si dhe ngritjes së kapaciteteve profesionale. Gjithashtu, ai synon të nxisë rrjetëzimin ndërkombëtar dhe të forcojë inovacionin në fushën e arsimit dhe të mësuarit gjatë gjithë jetës.

Kryetari Shehu theksoi se komuna e Junikut do të vazhdojë të forcojë praninë e saj në arenën ndërkombëtare, duke mbetur e përkushtuar ndaj vlerave evropiane, zhvillimit të qëndrueshëm lokal dhe avancimit të sistemit arsimor.

Në fund, ai shprehu mirënjohje për të gjithë partnerët dhe mbështetësit që kontribuuan në realizimin e këtij bashkëpunimi, duke e cilësuar atë si një moment të rëndësishëm për të ardhmen e komunës.