Java e ardhshme pritet të sjellë më në fund edhe borë

Meteorologët parashikojnë se javën e ardhshme, nga mesi i saj, në Kosovë pritet të ketë edhe reshje të borës.

Në fillim të javës parashikohet mot i butë. Nga e mërkura ftohtë, rënie të temperaturave dhe borë.

Sipas Prishtina Weather, nga e marta mbrëma një ciklon i fuqishëm nga Atlantiku verior do të depërtojë nga rajoni ynë. Ky ciklon do të sjellë edhe reshje të borës dhe masa të ftohta polare, të cilat do të zbresin ndjeshëm temperaturat në të dy vlerat ekstreme. Për shkak të diferencave të mëdha barike, pritet të fryejnë erëra të fuqishme, ditën e martë nga jugperëndimi, ndërsa ditën e mërkurë nga krahu verior. Sipas modeleve parashikuese, të mërkurë, erëra më të theksura mund të priten nga rajoni i Istogut.

Mot i ftohtë do të mbetet edhe nga dita e premte, mirëpo temperaturat maksimale gradualisht do të rriten në vlera pozitive përgjatë fundjavës.

Erërat që pritet të fryejnë gjatë kësaj jave do të shpërndajnë ndotësit, kështuqë vlerat e cilësisë së ajrit do të luhaten rreth vlerave mesatare dhe të mira.

3 shkurt: Butë, me vransira dhe intervale me diell. Në mëngjes në vise të ulëta mundësi për mjegull/mjegullinë.

4 shkurt: Butë dhe me erë. Vransira dhe intervale me diell. Në mbrëmje shi, që më vonë do të shndërrohet në borë.

5 shkurt: Ftohtë dhe erë veriore. Herët në mëngjes reshje bore, e gjatë ditës kohëpaskohe reshje të dobëta bore.

6 dhe 7 shkurt: Ditën e enjte ftohtë, kryesisht me diell. Erërat gradualisht do të pushojnë.

Të premten, kryesisht me vransira, orëve të mëngjesit vende-vende mundësi për reshje të dobëta bore.

Temperaturat do të pësojnë rënie në të dy vlerat ekstreme. Minimalet do të zbresin nga 3C në -5C, e maksimalet nga 14C dhe 15C, sa priten në fillim të javës, do të zbresin deri në 0C.