Rusi

Ish-diplomati serb: Vuçiqit do t’i bëhet sot presion i madh për Kosovën

Ish-diplomati Zoran Milivojeviq tha se presidenti i Serbisë, Aleksandar Vuçiq, do të jetë nën presion në samitin e parë të Bashkimit Politik Evropian, që po mbahet sot në Pragë, për çështjen e Kosovës dhe mosvendosjen e sanksioneve kundër Rusisë.

Në Pragë, sipas njoftimeve, pritet presion gjithnjë e më i fortë ndaj Serbisë për të vendosur sanksione ndaj Moskës.

Siç ka shtuar në takimin trepalësh me kancelarin gjerman Olaf Scholz dhe presidentin francez Emmanuel Macron, çështja e Kosovës do të dominojë.

“Është vazhdim i aksionit të këtyre dy vendeve. Ata filluan me emërimin e të dërguarve specialë për të ndihmuar Lajçakun”, tha Milivojeviq. Sipas tij, është e qartë se kjo dyshe dëshiron të mbajë një qëndrim më aktiv për këtë çështje.

“Absolutisht fokusi do të jetë në këtë. Natyrisht, kjo do të jetë tema qendrore e takimit. Një përpjekje e Parisit dhe Berlinit për të përshpejtuar dialogun dhe për ta ngritur atë në një nivel më të lartë”, tha ai.

Ai shtoi se po vjen 1 Nëntori, sërish çështja e tabelave dhe përshkallëzimi i mundshëm dhe gjithçka është në rend dite.

“Në këtë kuptim, nuk ka asnjë ndryshim në qëndrimin e Serbisë. Dialog po, për të përmbushur gjithçka që lidhet me Marrëveshjen e Brukselit, Asociacionin e Komunave Serbe, paqen dhe stabilitetin duke kërkuar një zgjidhje kompromisi”, vuri në dukje Milivojeviq.

Duke folur për vendosjen e sanksioneve ndaj Moskës, ai theksoi se në takim do të ketë vende të tjera që nuk kanë vendosur sanksione ndaj Rusisë, përveç Serbisë, Turqia, Armenia, Azerbajxhani, Gjeorgjia dhe Moldavia nuk kanë vendosur sanksione.

Ai vlerësoi se Serbia është cak i presionit sepse ka një pozicion qendror sepse Ballkani Perëndimor ka një interes të veçantë si për BE-në ashtu edhe për aleancën perëndimore në lidhje me konfliktin Rusi-Ukrainë.

“Serbia ka vendin më të rëndësishëm në këtë rajon, ka marrëdhënie të veçanta me Rusinë. Dhe për këtë, presioni ndaj Serbisë është më i fortë se sa është në rastin e Turqisë apo Azerbajxhanit. Ata kanë një pozicion më të favorshëm në krahasim me ne dhe janë të lirë nga ai lloj presioni”, theksoi ai.

Siç theksoi ai, dy çështje varen nga Serbia – Kosova dhe Bosnja dhe Hercegovina, dhe për këtë ka presion ndaj Serbisë që të kalojë në anën perëndimore.

Ai beson se presioni ndaj Serbisë tani do të jetë më i madh për shkak të lëvizjeve të fundit të Moskës, në mënyrë që të rritet presioni ndaj Rusisë në një shkallë edhe më të madhe.