Sistemet mbrojtëse
Iron Dome, David’s Sling dhe Arrow System – Tre sistemet e hekurta të mbrojtjes izraelite
Izraeli u përball me një prej sulmeve më të mëdha ndaj vendit nga Irani, ku qindra dronë dhe raketa (përfshi ato balistike), u hodhën nga Teherani në drejtime të ndryshme të territorit të shtetit hebre.
Megjithatë, 99% e këtyre sulmeve u interceptuan në ajër dhe vetëm një pjesë shumë e vogël arritën ta godisnin shënjestrën.
Për këtë, Izraeli i detyrohet tre sistemeve të mbrojtjes ajrore, të cilat bëjnë të mundur mbrojtjen e hapësirës ajrore, me një zhvillim teknologjik të jashtëzakonshëm dhe shumë të përparuar në krahasim me rajonin.
Iron Dome, David’s Sling dhe Arrow System, janë tre “xhevahiret” e Ushtrisë izraelite për mbrojtje.
Por, për çfarë shërbejnë ato?
Më i përdoruri dhe i njohuri është Iron Dome, një sistem anti-raketor, i cili shërben për kapjen e sulmeve me rreze të shkurtër, nga 4 deri në 70 kilometra. Ky sistem ka një kontroll përmes radarit dhe funksionon duke lëshuar predha interceptuese në ajër dhe duke shkatërruar ato armike.
David’s Sling është anti-raketori me rreze të mesme, i cili vepron nga 40 deri në 300 kilometra.
Shërben kryesisht për të interceptuar raketa balistike me rreze të shkurtër, raketa tokësore të kalibrit më të lartë, apo raketa lundruese. Interceptorët lëshohen përmes një njësie vertikale, zotërojnë radar dhe kanë efektshmëri shumë të lartë në luftën në rreze të mesme.
Arrow System është edhe ai i kalibrit më të lartë. Shërben për të interceptuar raketa balistike me rreze të mesme, deri në një lartësi prej 2 mijë e 400 kilometrash, në exo-atmosferë.
Përbëhet nga raketat Arrow 2 dhe Arrow3, të parat për një lartësi më të ulët dhe të dytat për lartësitë më të mëdha. Kanë një njësi lëshuese vertikale, drejtohen drejtpërdrejt nga qendra e kontrollit dhe mund të angazhohen edhe në luftime direkte, duke gjurmuar shënjestrën.
Sa kushtoi mbrojtja e Izraelit për një natë?
Izraeli arriti të mbrohej në mënyrë të suksesshme nga një sulm masiv lëshuar prej Iranit, ku qindra dronë dhe raketa u nisën drejt shtetit hebre.
Sipas zëdhënësit të Forcave të Mbrojtjes së Izraelit, Daniel Hagari, 99% e sulmeve u interceptuan dhe pjesa tjetër goditën zona pa shkaktuar dëme të mëdha infrastrukturore, pranë bazave izraelite.
Megjithatë, kjo mbrojtje e hekurt e Izraelit për vetëm një natë, kushtoi plot 1.3 miliardë dollarë.
Janë këto përllogaritjet e bëra sa i takon gjithë aseteve që Izraeli përdori në pak orë mbrojtje.
Shumica e të ardhurave të shpenzuara gjithsesi mendohet se ka të bëjë me fondet amerikane për ndihmën.
Kështu, IDF ka kapur 103 raketa balistike mbi Izrael.
Kostoja e çdo interceptimi në Ametz Hatz është rreth 1.85 milion dollarë, (kuptohet vetë – pjesërisht ose kryesisht financim amerikan).
Kostoja e çdo interceptimi duke përdorur një “shkop magjik” është rreth 700 mijë dollarë.
Supozohet ndërkaq se shumica e përgjimeve janë kryer duke përdorur një përgjues të vetëm në secilën raketë, për konsiderata logjike ushtarake të ekonomisë së armatimit dhe një aftësi përgjimi me katër shtresa në rast të dështimit të përgjimit të parë.
Kostot e interceptorëve dhe raketave të lundrimit janë dukshëm më të ulëta.
Nga kjo, rezulton se mbrojtja në terma të gjerë kushtoi rreth një miliardë shekel e gjysmë (1.3 miliard dollarë), duke përfshirë koston e karburantit.
