IRANI i ka përcjellë Pakistanit përgjigjen e tij ndaj propozimit të SHBA-së për një armëpushim, duke refuzuar një armëpushim dhe duke theksuar nevojën për një fund të përhershëm të luftës, raportoi të hënën agjencia zyrtare e lajmeve IRNA.
Përgjigja e Iranit përbëhet nga 10 pika, duke përfshirë ndërprerjen e armiqësive në rajon, një protokoll për kalim të sigurt nëpër Ngushticën e Hormuzit, heqjen e sanksioneve dhe rindërtimin, shtoi agjencia, transmeton Ballkani.info.
Presidenti i SHBA-së Donald Trump kishte kërcënuar më parë se do t’i sillte “ferrin” Teheranit nëse nuk arrinte një marrëveshje deri në fund të së martës për të hapur trafikun nëpër ngushticë, një rrugë kyçe detare për furnizimet globale me energji.
Ndërmjetësimi pakistanez
Plani i paqes, i ndërmjetësuar nga Pakistani, doli nga kontaktet e bëra gjatë natës së së hënës. Plani kërkon një armëpushim të menjëhershëm dhe vazhdimin e negociatave për një marrëveshje më të gjerë paqeje që do të përfundohet brenda 15 deri në 20 ditësh, tha për Reuters një burim i njohur me bisedimet.
Shefi i ushtrisë së Pakistanit, Feldmarshal Asim Munir, ishte në kontakt “gjithë natën” me zëvendëspresidentin e SHBA-së J.D. Vance, të dërguarin special të SHBA-së Steve Witkoff dhe ministrin e jashtëm iranian Abbas Araqchi, shtoi burimi. /Ballkani.info/







