Deputeti

Ilir Deda paralajmëron largimin nga skena politike

Deputeti i Alternativës, Ilir Deda, ka paralajmëruar largim nga politika. Ka thënë se është duke shqyrtuar mundësinë të largohet nga kjo fushë dhe të mos kandidojë më për deputet në zgjedhjet e ardhshme.

Deda nëpërmjet një postimi në Facebook ka falënderuar të gjithë ata që e kanë përkrahur për dy mandate që të jetë pjesë e Parlamentit të Kosovës, shkruan Ballkani.info

“Nuk ka qenë aspak rrugëtim i lehtë, por gjithmonë – me përkrahjen tuaj – kemi treguar që kjo Kosovë e jona mund të jetë përparimtare dhe e ndershme, e jo klienteliste dhe regresive”, ka shkruar ndër të tjera Deda.

Ky është postimi i tij i plotë:

Ju faleminderit të gjithëve që më keni përkrahur ndër vite, pa rezervë e pa interes, në angazhimin tim partiak. Nuk ka qenë aspak rrugëtim i lehtë, por gjithmonë – me përkrahjen tuaj – kemi treguar që kjo Kosovë e jona mund të jetë përparimtare dhe e ndershme, e jo klienteliste dhe regresive.

Unë nuk do të isha këtu sot pa ju. Por, ambienti i përgjithshëm politik e partiak në Kosovë aq ka degraduar, sa që verbëria e interesave të ngushta partiake e ka mbytur çfarëdo hapësire racionale shtetformuese, ku ikja nga përgjegjësia ndaj shtetit në politikë maskohet me parulla koti partiake.

Kosova po e kalon purgatorin e vet si prej sfidimit serioz të shtetësisë në arenën ndërkombëtare, e deri te puqja e dy proceseve jetike – atë të dialogut me Serbinë për marrëveshje potenciale finale dhe fillimin e procesve në Gjykatën Speciale. Këtë lloj sfidimi do ta kishin vështirë ta menaxhonin edhe shtetet më të zhvilluara e etabluara se sa Kosova. Por elita politike në pozitë e opozitë, e verbëruar nga konfliktet personale, nuk do që të jep përgjegje e të marr përgjegjësi për Republikën tonë të Kosovës. Në vend se të jetë fitorja politike e Kosovës prioritet, te ne është më e rëndësishme fitorja partiake individuale.

Prandaj, unë refuzoj të jem pjesë e kësaj lloj politike, esencialisht primitive dhe skajshmërisht të papërgjegjshme. Dhe rrjedhimisht, të gjitha veprimet politike do t’i marr në përputhje me bindjen se përgjegjësi primare kemi ndaj qytetarëve dhe shtetit.

Me këtë rast, të dashur qytetarë që ma keni dhënë besimin në dy mandate në Kuvendin e Kosovës, ju njoftoj se jam duke e shqyrtuar edhe mundësinë e moskandidimit në zgjedhjet e ardhshme.

Ky shqyrtim i angazhimit tim të mëtutjeshëm politik nuk është dorëzim, por një akt i protestës ndaj frymës shtet-degraduese që e ka mbërthyer skenën politike në Kosovë. /Ballkani.info/