Kryeministri i Kosovës

Hoti thirrje qytetarëve: Detyrimisht respektoni masat, situata me COVID-19 është e rëndë

Kryeministri i Kosovës, Avdullah Hoti ka folur rreth situatës me koronavirus në vend.

Hoti ka thënë se situata vazhdon të mbetet e rënduar, me numër të lartë të vdekjeve dhe rasteve të të infektuarve.

I pari i ekzekutivit ka kërkuar nga qytetarët që të respektojnë masat e vendosura nga Qeveria.

Sipas kryeministrit, beteja me këtë pandemi nuk fitohet vetëm nga mjekët, infermierët, policia dhe inspektorati, por kjo është është betejë e të gjithëve neve, e secilit qytetar.

Postimi i plotë:

Të dashur qytetarë,

Situata epidemiologjike në Kosovë është e rëndë. Numri i rasteve të infektuara mbetet i lartë, rastet e vdekjeve janë të shumta dhe të dhembshme.

Masat kufizuese DUHET të respektohen DETYRIMISHT. Inspektorati dhe policia janë në shërbim 24 orë pa pushim. Mjekët, infermierët dhe stafi mbështetës janë të sfilitur, por në ballë të detyrës dhe në rrezik permanent për jetën e tyre.

Megjithatë, beteja me këtë pandemi nuk fitohet vetëm nga mjekët, infermierët, policia dhe inspektorati. Kjo është betejë e të gjithëve neve, e secilit qytetar.

Duhet vetëdijesim i lartë për të ruajtur shëndetin publik, ndryshe do të përballemi me situatë dëshpëruese.

Duhet të gjejmë kurajo për fëmijët tanë, që duhet të fillojnë mësimin së shpejti, si dhe për prindërit tanë që po vuajnë më së shumti.