Hoti i drejtohet Kurtit: Nëse rrezikoni mbështetjen e SHBA-së do të detyroheni t’i lironi zyrat

Ish kryeministri i Kosovës, tash deputet i LDK-së, Avdullah Hoti, ka renditur disa “veprimet që janë koordinuar me Shtëpinë e Bardhë”, derisa në fund tha se nëse rrezikohet mbështetja e SHBA-së Kurti “do të detyrohet t’i lirojë zyret”.

Në rend të parë ai ka vendosur njohjen nga Izraeli e më pas demarkimin e një pjesë të kufirit me Serbinë.

Pika e tretë, sipas Hotit, është mbështetja për projekte madhore të hekurudhave dhe autostradave.

Hoti si pikë të katërt e ka renditur mbështetjen e MCC-së për gaz dhe energji.

Në fund ai ka shkruar se nuk duhet të rrezikohet mbështetja e SHBA-së.

Postimi i plotë:

Kur janë koordinuar veprimet tona me Shtëpinë e Bardhë:
1. Ka ndodhur njohja nga Izraeli,
2. E kemi demarkuar praktikisht një pjesë të kufirit me Serbinë,
3. E kemi siguruar mbështetjen për projekte madhore të hekurudhave dhe autostradave,
4. E kemi siguruar mbështetjen nga MCC për gaz dhe energji,
5. E kemi nënshkruar marrëveshjen për insentiva të investimeve dhe qasje në financa në tregje amerikane,
6. E kemi nënshkruar marrëveshjen për teknologji 5G të sigurt.
7. E kemi kornizuar dialogun vetëm për njohje reciproke, pa cenuar integritetin territorial, pa prekur karakterin unitar të shtetit të Kosovës, si dhe duke mos pranuar asgjë pa u nënshkruar marrëveshja për njohje reciproke.
Mos e rrezikoni këtë mbështetje, sepse do të mbeteni të izoluar si regjimi i Enver Hoxhës. Sigurisht se populli i Kosovës nuk e lejon që izolimi të vazhdoj. Do të detyroheni të lironi zyret dhe të dorëzoni mandatin tek ata që e ruajnë dhe avancojnë miqësinë e përhershme me Shtetet e Bashkuara të Amerikës.