Haziri tregon gjendjen me Covid-19 në Gjilan, bën thirrje për respektim të masave

Kryetari i Gjilanit, Lutfi Haziri, ka treguar se janë 135 qytetarë nga kjo komunë që kanë humbur jetën nga Covid-19 që nga fillimi i pandemisë në vendin tonë. Nëpërmjet një shkrimi në Facebook, ai u ka bërë thirrje të gjithëve që të vazhdojnë të respektojnë masat kundër koronavirusit.

“Kronika e zezë në Gjilan është vështirësia më e madhe që e kemi në këtë rrugë të vështirë, kur nga jeta ndahen qytetarët tanë dhe numri i tyre deri më tani është gjithsej 135 të vdekur’, shkroi ai.

Shkrimi i plotë i Hazirit në Facebook:

#COVID19 është në mesin tonë dhe deri në vaksinim, duhet të vazhdojmë me disiplinë, sipas rekomandimeve të IKSHPK. #Kujdesu për vetën dhe familjen tuaj!

Kronika e zezë në Gjilan është vështirësia më e madhe që e kemi në këtë rrugë të vështirë, kur nga jeta ndahen qytetarët tanë dhe numri i tyre deri më tani është gjithsej 135 të vdekur. Solidarizohemi me të gjitha familjet që kanë humbur jetën.

Pasqyra e përgjithshme në Gjilan që prej fillimit të pandemisë është si vijon: nga 20048 mostra, 6222 kanë rezultuar pozitivë, 5654 janë shëruar, 135 qytetarë e kanë humbur betejën me virusin, 433 raste janë aktive, të hospitalizuar me COVID janë 74 persona, dhe 104 mostra në pritje për  rezultat.