Haradinaj: Nuk lejojmë Serbinë e as një shtet tjetër ta rrezikojë Kosovën
Kryeministri Ramush Haradinaj ka thënë se nuk do të lejojnë askënd që ta rrezikojë shtetin e Kosovës, duke shtuar se me vënien e taksës prej 100 për qind ndaj prodhimeve serbe, zhvlerësimin e idesë për korrigjimin e kufijve dhe formimin e Ushtrisë, kanë arritur të rikthejnë shtetësinë e vendit.
Këto komente kryeministri Haradinaj i bëri gjatë Kuvendit të Punës të AAK-së, me crast ka numëruar “të arriturat” e qeverisë që ai drejton.
“Ne e bëmë ushtrinë e Kosovës. Ne arritëm ta legjitimojmë idenë e ndryshimit të kufjeve që në thelb e hidhte poshtë vendimin e GJND-së dhe Pakon e Ahtisarit duke e suspenduar kushtetutën tonë. Me taksën 100 për qind i treguam botës dhe vetvetes se nuk lejojmë as Serbinë e as një shtet tjetër ta rrezikojë Kosovën, i përmbushën kriteret e liberalizimit të vizave dhe presim Evropën që të marr vendim. Gjatë këtyre 20 muajve në udhëheqje rritëm numrin e gjyqtarëve dhe prokurorëve, të gjithë u kthyem në përkrahje te rendit dhe ligjit. Përmes taksës prodhimet e Serbisë dhe Bosnjës, u rrit prodhimi i Kosovës.
Kemi përmbyllur autostradën e ‘Arbën Gjaferi’, kemi filluar të tjerat. Komunat janë partnere në zhvillim ekonomik. Ka rritje ekonomike, kemi rritje të buxhetit. Jemi këtu për të kryer punët e këtij shteti dhe ti tregojmë shteteve tjera se jemi këtu për të bashkëpunuar me ty.
Në Bruksel po vazhdon dialogu, në arritjen e një marrëveshje gjithëpërfshirëse. Kemi rritje edhe të partisë”, tha ai.
Haradinaj tha se AAK-ja dallon nga partitë e tjera, pasi ka guximin të marrë përgjegjësi të reja.
“Aleanca asnjëherë nuk është ndal saherë që i është dhënë mundësia ka guxua me krijua. Vetëm Aleanca për dallim nga partitë tjera mundet me ec në krijimin vlerës së re me krijua atë që i mungon Kosovës.
Aleanca guxon me krijua ju jap shembullin e fundit krejt misionet e Kosovës s’janë të ngulfatur jemi vendosur ne objekte që s’janë ato që i kryejnë këto funksione. Kur vjen një delegacion i gjithë qyteti bllokohet jemi në situatë të rendë. Aleanca po e krijon Prishtinën e re. Prishtina e re është pronë e përbashkët e qeverisë nacionale dhe Komunës. Kemi me nënshkrua së bashku me kryetarin memorandum me mbi 1 milion metra katror.
Do të jetë projekti me i madh në Evropën juglindore. Nuk ka pengesë që na ndal ne vetëm mundemi me ndal vetën”, ka përfunduar Haradinaj.
Mbi 600 delegatë, gjatë punimeve njëditore të Kuvendit, do të diskutojnë për ndryshimet në statutin e Partisë, krijimin e Departamentit të Gruas, të Akademisë Politike, Kodit të Etikes dhe platformën e zhvillimit ekonomik, të cilat do të jenë vetëm disa prej çështjeve që do të trajtohen në punimet e këtij kuvendi.
