I pari dhe i dyti

Haradinaj i kundërpërgjigjet Thaçit: Kufijtë nuk negociohen

Kryeministri i Kosovës, Ramush Haradinaj ka dhënë detaje për Rezolutën e Qeverisë për dialogun me Serbinë.

Në një postim në Facebook, Haradinaj ka përsëritur se edhe në rezolutë thuhet që kufijtë e Kosovës mbetin të pandryshueshëm dhe të panegociushëm.

Ky postim i Haradinajt mund të merret edhe si kundërpërgjigje ndaj presidentit Thaçi, i cili sot në një konferencë për media tha se angazhohet për bashkimin e Luginës së Preshevës me Kosovë si mënyrë e korrigjimit të kufirit me Serbinë.

Më poshtë postimi i Haradinajt:

Në pikën një dhe pikën gjashtë të Rezolutës së Qeverisë, të dakorduar sot me kryetarët e partive të koalicionit qeveritar, është definuar qartë se kufijtë e Republikës së Kosovës, shtet i pavarur, Sovran, demokratik, unik dhe i pandashëm, janë të pacenueshme dhe të panegociueshme dhe se Kuvendi i Republikës së Kosovës, si autoritet suprem, me votat e 2/3 e të gjithë deputetëve, do të Ratifikojë Marrëveshjen Ligjërisht Obligative në mes të Republikës së Kosovës dhe Republikës së Serbisë.