Aleanca për Ardhmërinë e Kosovës (AAK) Ramush Haradinaj do të fillojë nga shtatori një proces bashkëbisedimi me qytetarët e Kosovës.
Kështu ka njoftuar Haradinaj, të hënën përmes një postimi në rrjetin social “Facebook”.
“Do të flasim hapur për dialogun për njohje reciproke Kosovë-Serbi; për situatën e rëndë ekonomike – sociale me theks të veçantë për krizën e rëndë energjetike”, ka thënë Haradinaj. “Poashtu edhe për tema të tjera që sot e preokupojnë vendin dhe qytetarin”.
Ai tha se këto ditë do t’i njoftojë qytetarët për orarin dhe vendin e takimeve.
Ky bashkëbisedim, sipas Haradinaj do të bëhet për shkak të situatës në vend, politike dhe ekonomike.
Postimi i plotë:
Të nderuar anëtarë e simpatizantë të Aleancës, të nderuar qytetarë të Kosovës
Procesi i dialogut, situata e krijuar politike dhe ekonomike në vend, na shtynë të jemi më të angazhuar e më të fokusuar si asnjëherë me parë.
Që nga java e parë e shtatorit të këtij viti, do të filloj një proces bashkëbisedimi me qytetarët e Kosovës në vendbanime të ndryshme të vendit.
Do të flasim hapur për dialogun për njohje reciproke Kosovë-Serbi; për situatën e rëndë ekonomike – sociale me theks të veçantë për krizën e rëndë energjetike.
Poashtu edhe për tema të tjera që sot e preokupojnë vendin dhe qytetarin.
Këto ditë do t’ju njoftoj për orarin dhe vendin e takimeve.
Me respekt Ramush Haradinaj







