Hakerët u qasen të dhënave të vaksinës, pas sulmit mbi rregullatorin e BE-së

Kompania gjermane bioteknologjike “BioNTech” ka njoftuar të mërkurën se dokumentet rregullatore lidhur me vaksinën e saj kundër COVID-19, të zhvilluar në bashkëpunim me “Pfizer”-in, janë “qasur në mënyrë të paligjshme” pas një sulmi kibernetik ndaj rregullatorit shëndetësor të Evropës.

Më herët, Agjencia Evropiane e Mjekësisë (EMA), e cila është përgjegjëse për vlerësimin dhe aprovimin e ilaçeve, pajisjeve mjekësore dhe vaksinave në emër të Bashkimit Evropian, ka njoftuar se ka qenë në cak të një sulmi kibernetik. Mirëpo, nuk ka ofruar hollësi.

Nuk janë ofruar të dhëna të hollësishme se kur apo si ka ndodhur sulmi, kush ishte përgjegjës apo çfarë informacionesh të tjera mund të jenë kompromentuar.

Pas zbulimit të rastit, “BioNTech” ka bërë të ditur se EMA-ja e ka informuar se “agjencia ka qenë në shënjestër të një sulmi kibernetik dhe se disa dokumente të lidhura me miratimin prej rregullatorit të vaksinës kandidate kundër COVID-19 të ‘Pfizer’-it dhe ‘BioNTech’-ut… është qasur në mënyrë të paligjshme”. Kompania ka shtuar gjithashtu se “asnjëri prej sistemeve të ‘BioNTech’-ut apo ‘Pfizer’-it nuk janë qasur pas këtij incidenti”, dhe ka shtuar se nuk është në dijeni nëse është siguruar qasje në të dhënat mbi pjesëmarrësit e testimeve.

Mesazhet e dërguara në adresë të “BioNTech”-ut dhe “Pfizer”-it, me kërkesën për më shumë hollësi rreth rastit, kanë ngelur pa përgjigje.

EMA-ja nuk ka dhënë hollësi lidhur me sulmin, por ka bërë të ditur vetëm se është duke e hetuar incidentin në bashkëpunim me autoritetet e zbatimit të ligjit.

Përpjekjet për sulme kibernetike ndaj organizatave mjekësore dhe qendrave të përkujdesjes shëndetësore janë intensifikuar gjatë pandemisë së COVID-19, në kuadër të synimeve të vazhdueshme të agjentëve të spiunazhit, si dhe të kriminelëve kibernetikë për të siguruar informatat më të fundit lidhur me shpërthimin e sëmundjes.

Lajmi për sulmin kibernetik është bërë i ditur në ditën kur Kanadaja u bë shteti i tretë në botë, pas Britanisë së Madhe dhe Bahrejnit, që i ka dhënë dritën jeshile përdorimit të vaksinës kundër sëmundjes pandemike të kompanive “Pfizer” dhe “BioNTech”.

Aprovimi e hap rrugën që dozat e para të kurës së këtyre kompanive të dërgohen dhe të administrohen në mbarë Kanadanë.

Shteti i Amerikës Veriore ka bërë një vlerësim të përshpejtuar për aprovimin e vaksinës, sikurse ka vepruar edhe Agjencia amerikane e ushqimit dhe ilaçeve, kur aprovoi përkohësisht përdorimin e vaksinës për raste emergjente.

Ministria e Shëndetësisë në Kanada ka njoftuar se me këtë do të lejohet vaksinimi i personave mbi gjashtëmbëdhjetë vjeç. Lajmi u bë i ditur vetëm një ditë pasi që një panel këshilltarësh amerikanë u mblodh për të vlerësuar nëse agjencia duhet të lejojë përdorimin e vaksinës së “Pfizer”-it, dhe pasi qytetarët britanikë u bënë të parët në botë që u injektuan me dozat e kësaj vaksine.

Ndërkaq, gjatë së mërkurës rregullatori mjekësor i Britanisë së Madhe ka këshilluar personat që kanë reaksione serioze alergjike të mos e marrin vaksinën e aprovuar, pasi që dy persona kanë raportuar për efektet e kundërta në ditën e parë të vaksinimit.

Shërbimi Kombëtar britanik i Shëndetësisë ka njoftuar se këshilla është ndryshuar, për shkak se dy punëtorë të shërbimit kanë raportuar reaksione anafilaktoide të lidhura me vaksinimin. Autoritetet britanike kanë kërkuar më shumë informacione lidhur me rastet. Ndërkaq, “Pfizer” ka bërë të ditur se persona me reaksione serioze alergjike ishin shmangur nga testet e fazës së fundit. Autoritetet kanë përpiluar dokumente si përgatitje për takimin e këshillit konsultativ. Aty thuhet se të dhënat e efikasitetit dhe sigurisë përmbushin pritjet për autorizim. Në dokumentin e shkurtër thuhet se 0.63 për qind e njerëzve në grupin e vaksinës dhe 0.51 për qind në grupin me plazmë raportuan reaksione të mundshme alergjike.