Gjendja shëndetësore e minatorëve të minierës së “Trepçës” është përkeqësuar.
Mjeku i QKMF-së, Ridvan Ramagjiku, për Tëvë1 ka bërë të ditur se sot, në ditën e gjashtë të grevës, 18 minatorë kanë marrë trajtim mjekësor.
Ramagjiku, ka njoftuar se minatorët kanë pasur kokëdhimbje, derisa dy prej tyre i kanë transferuar në spital.
Ndërkaq, disa grevistë ekipes së Tëvë1 i kanë thënë që një minator ka pësuar sulm kardiak, ku pas trajtimit mjekësor sërish është kthyer brenda në minierë për të vazhduar grevën.
Kryetari i Sindikatës së Minatorëve, Ibrahim Jonuzi, i ka bërë thirrje kryeministrit të Kosovës, Albin Kurti, që t’i vizitojë dhe t’u bëjë zgjidhje minatorëve.
Prezentë në minierën e “Trepçës” janë edhe njësitë policore.
Minatorët kanë hyrë në grevë si shenjë proteste për vonesat që po u bëhen në ekzekutimin e pagave.
Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve.







