Grenell skeptik se mund të ketë zgjerim të investimeve në Kosovë “ku siguria fizike dhe pronëse varet nga NATO”
“Është naive të llogaritet në zgjerimin të huaj biznesor në rajon ku siguria fizike dhe pronësore garantohet nga prania e trupave të NATO-s”, ka thënë ish-Përfaqësuesi Special i ish-Presidentit të ShBA’së, Richard Grenell, duke folur në tre vjetorin e Marrëveshjes së Uashington për normalizim të marrëdhënieve ekonomike mes Kosovës dhe Serbisë.
Këto komente Grenell i bëri në median serbe “Kosovo-Online”, ku u shpreh se marrëdhëniet ndërmjet Kosovës dhe Serbisë “veçse janë përkeqësuar” dhe se duhet larguar “nga manovrat politike, fitoret simbolike dhe qërimin e hesapeve”.
“Duhet lëvizur drejt një të ardhmeje ekonomike”, ka thënë Grenell.
“Fatkeqësisht, Joe Biden dhe administrata e tij e kanë bërë të qartë se Ballkani dhe populljt ballkanikë nuk janë prioriteti i tyre. Është e qartë se njerëzit e Kosovës, Serbisë dhe më gjerë në Ballkan kanë përfituar shumë nga qëndrimi i Donald Trump në Shtëpinë e Bardhë, dhe unë sinqerisht shpresoj se do të shohim një tjetër administratë Trump, në mënyrë që ai të bëjë sërish rajonin e Ballkanit një prioritet kryesor për Amerikën”, përfundoi Grenell.
