Ministria e Mbrojtjes

Gjermania do të dërgojë 155 ushtarë shtesë në Kosovë

Ministria e Mbrojtjes e Gjermanisë ka njoftuar se do të dërgojë më shumë ushtarë në Kosovë në kuadër të forcës paqeruajtëse të udhëhequr nga NATO-ja (KFOR).

“Mund të konfirmoj se qeveria federale (gjermane) ka vendosur të zgjerojë angazhimin e saj në KFOR nga prilli i vitit 2024, pavarësisht ngjarjeve të fundit në Kosovë”, tha në një konferencë për media Mitko Mueller, zëdhënës i Ministrisë së Mbrojtjes, transmeton AA.

Mueller u referohej tensioneve të rritura në veri të Kosovës pasi një polic kosovar dhe katër persona nga një grup i serbëve të armatosur më 24 shtator u vranë gjatë një përleshje në fshatin Banjskë në veri të Kosovës.

Në këtë zonë u dërguan një numër i madh i forcave të sigurisë, ndërsa pikëkalimi kufitar Bërnjak midis Kosovës dhe Serbisë u mbyll.

Veriu i Kosovës ka qenë skenë e trazirave që nga muaji prill kur serbët lokal bojkotuan zgjedhjet në veri të vendit, pas çka shpërthyen protesta kundër zgjedhjes së shqiptarëve në krye të komunave.

Siç tha Mueller, kontingjenti i ri i ushtarëve do të zëvendësojë forcat austriake të KFOR-it dhe do të trajnohen për t’u përballur me trazirat.

Në konferencën për media, ai përmendi 155 ushtarë shtesë dhe njoftoi se aktualisht janë 71 trupa gjermane me bazë në Kosovë.

Mandati gjerman për misionin e KFOR-it ka një maksimum prej 400 ushtarësh.