Ministrja e Punëve të Jashtme, Donika Gërvalla, ka thënë se nuk e ka në plan ta shkarkojë ambasadorin e Kosovës në Kroaci, Martin Berishaj.

“Nuk kam asnjë kërkesë për shkarkimin e ambasadorit Berishaj, nuk shkarkohet ambasadori për një lajm në media dhe për një spekulim, është papërgjegjësi totale. Nëse unë adresoj në institucione të tre shteteve që përmendën në ato spekulime dhe nuk kam asnjë fakt, unë do ta quaj spekulim”, tha Gërvalla në një intervistë në Kanal 10.

“Nuk ka asgjë deri sot për ambasadorin Berishaj, por veç fushata denigruese. Në rastin e ambasadorit Berishaj është tepruar, ata që i kanë këto pretendime le të na sjellin faktet. Berishaj ka shkuar është paraqitur në prokurori dhe në komisionin hetimor parlamentar”, shtoi kryediplomatja kosovare.

Gjatë muajit mars, Berishaj ka ishte intervistuar në Prokurorinë Speciale si i dyshuar për shpëlarje të parave.

Vitin e kaluar mediat sllovene raportuan për një skandal të madh financiar ku ishte i përfshirë edhe ambasadori Berishaj.

Në artikullin e TV Planet thuhej se Martin Berishaj kishte kompani në Mal të Zi me emrin MB Consulting dhe paguhej si konsulent nga kompania e energjisë elektrike GEN-I dega në Beograd.

Më vonë, do pranohej nga vetë Berishaj se është e vërtetë që ka kompani me këtë emër dhe gjithashtu është e vërtetë se u pagua nga GEN-I dega në Beograd.

Berishaj veç marrjes së parave dhe kompanisë në Mal të Zi, ai po dyshohet se një pjesë të parave të marra në Beograd nga GEN-I i ka sjellur edhe në Kosovë.

Ato para të Berishajt dyshohet se financuan fushatat e Lëvizjes Vetëvendosje dhe Listës Guxo.

Në anën tjetër, në Kosovë Berishaj akuzohet nga Prokuroria Themelore për “mos-deklarim të pasurisë apo deklarim të rrejshëm të pasurisë” dhe nga Prokuroria Speciale për “shpëlarje parash”.

Ekziston po ashtu edhe një kallëzim penal për Berishajn i cili dyshohet se ka bërë evazion fiskal dhe nuk ka paguar taksa.

Përkundër këtij skandali me përmasa rajonale, Berishaj ka mbetur i paprekur në pozitën e tij.

Deri më tani, Presidentja Vjosa Osmani, kryeministri Albin Kurti dhe ministrja e Punëve të Jashtme të Kosovës, Donika Gërvalla, i janë vënë në mbrojtje Berishajt dhe thonë se s’kanë arsye ta shkarkojnë.