Trajneri i Tottenhamit

Garë dyshe për Pochettinon, e duan dy super klube

Sipas të përditshmes angleze “The Guardian” drejtuesit e Real Madridit janë duke menduar për shkarkimin e teknikut të përkohshëm Santiago Solari pas humbjes historike 0-3 në shtëpi ndaj CSKA Moskës mbrëmjen e së mërkurës në Champions League.

Në këtë panoramë të re është pikërisht emri i Mauricio Pochettinos që lakohet si trajneri i ri për stolin e Real Madridit, pas shkarkimit të Julen Lopeteguit. Pochettino ka treguar se ka arritur ta kthejë ekipin e Totenhamit në një prej pretendentëve për titullin në Premier League gjatë qëndrimit të tij në stolin e Spurs.

Gjithsesi, nga ana tjetër në lojë për shërbimet e tij janë edhe “Djajtë e Kuq” të Manchester United, të cilët projektojnë tek ai njeriun ideal për të sjellë ndryshimin e domosdoshëm në ecurinë e klubit anglez.

Në këtë kontekst amplifikohet gara për shërbimet e tij. Në rast të mos kualifkimit në Champions edicionin e ardhshëm të Manchester United, shkarkimi i Jose Mourinhos është i paevitueshëm dhe tashmë drejtuesit e United janë të gatshëm të paguajnë 40 milionë paund për të ulur në stolin e tyre argjentinasin e klubit rival.

Mauricio Pochettino ishte zgjedhja e parë për të zëvendësuar Louis Van Gaal në vitin 2016-të. Këtë herë 46-vjeçari mund të joshet për të marrë drejtimin e një prej klubeve më të mëdha në botë çka do të sillte një klimë të re në organikën e “Djajve të Kuq” me lojtarë si Paul Pogba dhe Romelu Lukaku që do ta mirëprisnin një ndryshim të tillë.