Fshati kosovar ku ka vetëm fallxhore, kështu i zgjidhin hallet ato

Kushdo që ka probleme të ndryshme në familje, ata që nuk kanë fat në dashuri, ata që duan të dinë për fatin e tyre në të ardhmen “ilaçin” mund ta gjejnë në Banjë të Istogut, e njohur në gjithë Kosovën si Ilixha e Pejës.

Se aty ndodhen fallxheshat më të mira, e këtë e tregojnë radhët e gjata të “hallexhinjve” nga gjithë trevat shqiptare. Banja e Istogut, e cila në gjithë Kosovën njihet si Banja e Pejës (Ilixha e Pejes), nuk është e njohur vetëm si qendër rehabilituese, në të cilën njerëz me probleme shëndetësore nga e gjithë Kosova shkojnë për t’u shëruar, por edhe për ta gjetur rehatinë.

Uji i ngrohtë që buron nga thellësia e tokës në këtë fshat, i cili i ngjan një qyteze, nuk është ilaçi i vetëm për shërbimin e shumë sëmundjeve. Banja tashmë është shndërruar edhe në një qendër tjetër – të shkrirjes së plumbit dhe parashikimit të fatit në filxhan të kafesë. Fitohet përshtypja se më shumë njerëz shkojnë tek fallxheshat sesa njerëz që ia mësyjnë qendrës rehabilituese në Banjë për t’u shëruar.

Edhe ata që shkojnë për herë të parë nuk e kanë vështirë t’i gjejnë fallxheshat, pasi që secila nga ato ka vendosur tabela që tregojnë shtëpitë ku ndodhen ato. “Te Sanija”, “Te Gila”, “Plumbtore”, “Falltore”, janë vetëm disa nga emrat që tërheqin “hallexhinjtë”.