Kuvendi Komunal i Drenasit sot ka mbajtur seancën e jashtëzakonshme me pikën e vetme të rendit të ditës ku opozitarët kanë kërkuar shfuqizimin e vendimit të DKA-së për mbylljen e shkollave në Abri, Godancë dhe Gjergjicë, ku fëmijët tash e dy muaj kanë mbetur pa mësim.
Tafil Halilaj Drejtor i Arsimit në komunën e Drenasit për Ballkani.info ka treguar se sot kjo pikë e rendit të ditës nuk është aprovuar dhe është mbyllur.
Sipas tij, Ministria e Arsimit Shkencës dhe Teknologjisë ka kërkuar nga komuna që ta anulojnë vendimin edhe këtë vit, por që komuna nuk ka pranuar një gjë të tillë ku sipas tij vendimi është i bazuar më ligj.
Ndër të tjera ai ka cekur se fëmijët janë duke vazhduar mësimin dhe se gjithçka është në rregull, shkruan Ballkani.info.
“Sot është mbajtë seanca, ku e kemi pasë si pikë të rendit të ditës në kuvend, nuk është aprovu dhe është mbyllë. Përfaqësues të ministrisë i kemi pas këtu për të biseduar, na ju kemi treguar ligjin me të cilën mbështetemi në të, ata kanë kërkuar që ta anulojmë edhe këtë vit këtë vendim, por ne nuk kemi pranuar sepse ky vendim është i bazuar në ligj dhe jemi në rregull. Fëmijët janë duke vazhduar mësimin nëpër shkollën gjithçka është në rregull”, ka thënë Halilaj.
Sipas Komunës së Drenasit, arsyeja për mbylljen e këtyre shkollave ka qenë numri i vogël i nxënësve mundësitë buxhetore./Ballkani.info







