Hifzi Rashiti, familjar i policit të plagosur pas mesnate gjatë sulmeve nga grupet e armatosura në fshatin Banjska të Zveçanit, ka thënë se gjendja e tij vazhdon të jetë mirë dhe jashtë rrezikut për jetë.

“Gjendjen e ka stabile… Nuk kemi të drejtë të japim informacione (sa i përket si ka ndodhë rasti)… Lajmin e kemi marrë përmes mediave… Besoj nesër në mëngjes e lirojnë”, tha Rashiti.

Policin e plagosur e ka vizituar edhe kryetari i Sindikatës së Policisë, Imer Zeqiri.

Në orët e para të mëngjesit të ditës së sotme (e diel) është vrarë rreshteri i Policisë së Kosovës, Afrim Bunjaku ndërsa polici tjetër Alban Rashiti ka mbetur i plagosur. Ngjarja e rëndë ka ndodhur në fshatin Banjska të Zveçanit ku është sulmuar patrulla policore.