Presidenti i Turqisë, Recep Tayyip Erdogan, foli sërish për konfliktin në Lindjen e Mesme, duke theksuar se Irani ka të drejtë të mbrohet, raporton Anadolu.
“Është krejt e natyrshme, legjitime dhe e ligjshme që Irani të mbrohet kundër dhunës izraelite dhe terrorizmit shtetëror”, tha Erdogan gjatë një takimi të grupit parlamentar të Partisë për Drejtësi dhe Zhvillim (AK) në kryeqytetin Ankara, transmeton Ballkani.info.
Deklaratat e tij vijnë në një kohë të përshkallëzimit të konfliktit midis Izraelit dhe Iranit. Duke theksuar seriozitetin e konfliktit, Erdogan dënoi gjithashtu udhëheqjen izraelite: “Netanyahu ka kaluar prej kohësh tiranin Hitler në krimin e gjenocidit. Shpresojmë që fati i tyre të mos jetë i njëjtë.”
“Ne jemi përgatitur dhe po përgatitemi për çdo zhvillim”
“Ne po bëjmë gjithçka që mundemi për të ndaluar agresionin çnjerëzor kundër Gazës, Sirisë, Libanit, Jemenit dhe Iranit”, shtoi ai.
“Gjaku i civilëve të masakruar, foshnjave dhe fëmijëve të vrarë nuk ka spërkatur vetëm duart dhe fytyrat e atyre që mbështesin arrogancën izraelite, por edhe atyre që qëndrojnë të heshtur,” vuri në dukje ai.
Duke folur për shqetësimet për stabilitetin rajonal, Erdogan pohoi se Turqia mbetet vigjilente. “Ne po ndjekim nga afër sulmet terroriste izraelite ndaj Iranit. Të gjitha institucionet tona janë në gatishmëri për pasojat e mundshme të këtyre sulmeve ndaj Turqisë,” tha ai.
“Kombi ynë mund të jetë në paqe. Qeveria është plotësisht e përkushtuar për të mbrojtur interesat, paqen, unitetin dhe sigurinë e Turqisë. Ne jemi përgatitur dhe po përgatitemi për çdo zhvillim dhe skenar të mundshëm negativ”, përfundoi presidenti turk. /Ballkani.info/







