Prokuroria

Elvana Gjata thyen heshtjen, kjo është letra e saj në prokurori

Report Tv zbardh detaje të komunikimit të Elvana Gjatës me grupin hetimor lidhur me përplasjen me armë zjarri në ish-bllok mbrëmjen e 4 tetorit në zonën e ish-bllokut. Burime për Report Tv saktësuan se Elvana Gjata ka statusin e dëshmitares dhe ndaj saj nuk ka masë sigurie, ndërsa në kërkim policor vijon të jetë i fejuari i saj Ervin Mata, protagonist në përleshjen me armë zjarri me grupin e Ervis Martinajt.

Mësohet se tre javë më parë Elvana Gjata ka thyer heshtjen përmes një letre dërguar me postë prokurorisë, por detajet janë bërë publike vetëm sot. Drejtuar organit të akuzës, këngëtarja i njofton se nuk ndodhet në Shqipëri për arsye shëndetësore, ndërsa shton se është njoftuar nga mediat lidhur me faktin se prokuroria kërkon dëshminë e saj për rrethanat e asaj që ndodhi brenda lokal “Monopol”, edhe pse thekson se nuk ka qenë e pranishme në momentin kur nisi konflikti me armë.

“Jam njohur nga media se kërkohet dëshmia ime. Ndodhem jashte vendit për arsye shëndetësore, jam njohur nga media se kërkoni dëshminë time. Sapo të jem në Shqiperi do të paraqitem për të dhënë deklarimet e mia”, ka thënë Elvana Gjata.

Edhe sipas hetimeve të policisë dhe prokurorisë, por edhe dëshmive të administruara tashmë nga grupi hetimor, kengëtarja Elvana Gjata s’ka qenë e pranishme në momentin e të shtënave ku nga përplasja fizike dhe përdorimi i armëve të zjarrit mbeti i vrarë Fabjan Gaxha si dhe u plagosën Ervis Martinaj dhe Eljo Hato. Në kërkim për ngjarjen janë shpallur ndërkohë Ervin Mata, Merviol Bilo dhe Fabjol Alushi. Në kërkim vijon të jetë edhe ish-polici Santiago i cili mbrëmjen e 4 tetorit hyn dhe del lirisht nga lokali “Monopol” dhe në kokë mban kapele. Report Tv transmetoi ekskluzivisht videon e përplases me armë zjarri.

Ndërsa një javë më parë u lirua nga burgu Geldo Hoti, mik me komandon Merviol Bilo. Ai u arrestua pas dyshimeve se kishte qëlluar me armë në momentin e përplasjes, por pas masës së arrestit me burg 45 ditor, ai u la i lirë, pasi prokuroria nuk depozitoi prova shtesë në ngarkim të tij. Gjithashtu, i lirë u la edhe biznesmeni Ajaks Boshnjaku, mik me Ervin Matën, i cili në dëshminë përpara grupit hetimor dha detaje rreth motiveve që çuan në ngjarjen e rëndë, duke theksuar se gjithçka nisi nga një “Pse më sheh ti o p*** motre” mes Fabjan Gaxhës dhe komandos Merviol Bilo, teksa në banak Ervis Martinaj dhe Ervin Mata ishin duke pirë verë sëbashku…

Ndërsa më herët u raportua se “molla e sherrit” ishte vetë këngëtarja pas dyshimeve se ajo ishte ngacmuar në sy të komandos Merviol Bilo (i afërm me këngëtaren) nga një prej njerëzve të Ervis Martinajt jashtë “Monopol”, teksa priste partnerin e saj Ervin Mata dhe konflikti është mbartur edhe brenda lokalit. Dhe për këtë shkak, policia dhe prokuroria kërkuan dëshminë e Elvana Gjatës, duke e shpallur edhe në kërkim policor në datën 9 tetor.

Në sistemit TIMS figuron që Elvana Gjata është larguar drejt Vjenës katër orë pas ngjarjes përmes aeroportit të Rinasit dhe destinacioni i saj ka qenë Gjermania nga ku nuk u kthye më.