Policia e Kosovës ka bërë të ditur se është duke zhvilluar një operacion për gjetjen e personit i cili dyshohet për vrasjen e një 27-vjeçari sot në Prishtinë. Në kërkim të të dyshuarit janë bastisur tri lokacione të ndryshme ku mendohet se ai ka mundur të fshehet për t’i ikur policisë.

Përmes një komunikate për media, policia bën të ditur se janë duke punuar për zbardhjen e të gjitha rrethanave që kanë të bëjnë me rastin. Ndërkaq theksohet se janë duke intervistuar persona të cilët mund të jenë të përfshirë në këtë rast.

“Aktualisht jemi në fazën preliminare të hetimit të rrethanave të këtij rasti dhe po ndërmarrim të gjitha veprimet e nevojshme për ndriçimin e plotë të rrethanave që e karakterizojnë këtë rast, përfshirë këtu edhe intervistimin e cilitdo person, që në një ose mënyrë tjetër mund të jetë i implikuar në rast”, thekson policia.

Ndërkaq deri më tani policia ka kryer bastisje në tri lokacione të ndryshme ku mendohet se i dyshuari mund të jetë fshehur për t’iu shmangur policisë.

“Ndërkohë që është zgjeruar rrethi i hetimit janë kryer tri operacione të bastisjeve në lokacione të ndryshme ku dyshohet se i dyshuarit mund të jetë fshehur për t’iu shmangur arrestit policor. Të njëjtin policia e ka shpallur në kërkim policor dhe po punon për kapjen e tij”, theksohet në komunikatë.