Pastrimi i parave dhe korrupsionit po e dëmton zhvillimin ekonomik dhe funksionimin e shtetit të Kosovës. Prandaj autoritetet e Kosovës duhet të punojnë për zbatueshmërinë e ligjit.
Kështu u tha në konferencën e organizuar nga Zyra e Bashkimit Evropian në Kosovë dhe Këshilli i Evropës në kuadër të projektit të përbashkët kundër krimit ekonomik, në të cilin janë dhënë vlerësime rreth përputhjes së ligjeve të Kosovës me standardet evropiane në luftimin e korrupsionit, pastrimit të parave.
Libor Chlad nga Zyra e BE-së në Kosovë u shpreh se ndonëse Bashkimi Evropian do të vazhdojë të përkrah Kosovën për luftimin e dukurive negative, në duart e autoriteteve kosovare është krijimi i një shteti ligjor.
Ai tha se përkundër që Kosova ka bërë disa ndryshime sa i takon aspektit ligjor ende ka hapësirë për të punuar në këtë drejtim.
Kurse, ministri i Financave, Bedri Hamza me këtë rast u shpreh se pastrimi i parave po dëmton shumë zhvillimin ekonomik të vendit, por që institucionet e Kosovës po punojnë maksimalisht në luftimin e krimit ekonomik.
Hamza këtë raport e ka vlerësuar si vegël të çmuar e cila forcon kapacitetet e Kosovës për luftimin e këtyre dukurive negative.
I pari i financave të Kosovës tha se kjo Ministri ka krijuar korniza ligjore në harmoni me standardet ndërkombëtare që mundësojnë zbatimin korrekt të ligjit.
Ministri i Drejtësisë, Abelard Tahiri u shpreh se përmes një reformimi të thellë ligjor, prokurorët dhe hetuesit e Kosovës do të keni mundësi që të kenë instrumente të përshtatshme për luftimin e korrupsionit dhe parandalimin e pastrimit të parave.
Ai tha se presin që të ketë një koordinim pozitë dhe opozitë për të aprovuar draft kodin e ligjin të Kodit Penal dhe konfiskimit të pasurisë së jashtëligjshme.
Zëvendës shefi i Zyrës së Këshillit të Evropës në Prishtinë, Vahagn Myradyan u shpreh se vetëm duke punuar të gjitha institucionet së bashku mund të arrihet luftimi i korrupsionit dhe shpëlarja e parave.
Ai duke theksuar angazhimin e Këshillit Evropian ndaj Kosovës tha se parim fundamental i tyre është të pengohet mos zbatimi i ligjit.
Në fund të kësaj konference u lansua edhe raporti për përputhshmërinë e Kosovës me standardet evropiane dhe ndërkombëtare në luftën kundër korrupsionit (LKK), dhe parandalimin e pastrimit të parave dhe luftimin e financimit të terrorizmit (PPP/LFT)./KosovaPress/







